…I tady Kreml prosta razmaža pa ściency

Vizit Pucina 28 traŭnia i potym, nazaŭtra, narada ŭ Łukašenki vyśviecili niekalki rečaŭ. Zaraz, kali trochi ŭlehlisia žarści vakoł epatažnych zajaŭ vice-premjera Kudryna, što staŭ hałoŭnym ńjuśmiejkieram u dzień prylotu maskoŭskaj kamandy, varta padkreślić niekalki vysnoŭ.

Pa-pieršaje, aficyjny kiraŭnik upieršyniu tak vyrazna, adkrytym tekstam pryznaŭ, što niezaležnaść krainy ŭ niebiaśpiecy. I pahroza idzie sami viedajecie adkul.

«Hulnia raspačata nie na žart, majcie na ŭvazie. Vystaim — budzie dziaržava. Nie vystaim — złamajuć i biaspłatna ŭ kišeń pakładuć, budziem biehać potym dy pahladać naleva i naprava, kab nam kavałak chleba sa stała kinuli». Jaśniej nie skažaš.

Miž tym užo niekalki hadoŭ hučaŭ refren, što Biełaruś adbyłasia jak suvierennaja dziaržava. Abo heta było mocnaj hipierbałaj, abo zaraz Maskva adkinuła ŭsie cyrymonii i ŭziała za harlak čysta kankretna. A moža, i toje, i druhoje.

Va ŭsiakim razie, jość mocnyja padstavy mierkavać, što

za kulisami «sajuznaha saŭminu» išła dušyłaŭka ŭ pytańniach biełaruskich aktyvaŭ, a taksama — kab pryznali Abchaziju dy Paŭdniovuju Asieciju.

Heta prarvałasia nazaŭtra ŭ emacyjnych pasažach Łukašenki. «Niaŭžo vy nie razumiejecie, što ŭžo nie pieršy raz stvarajecca situacyja, kali nas chočuć uziać holeńkimi i hołymi rukami, biaspłatna?» — rytaryčna spytaŭsia aficyjny kiraŭnik u atačeńnia. Što ž da pryznańnia kaŭkazskich respublik, to jon razdražniona zaŭvažyŭ: «Heta, u rešcie rešt, nie rasijskaje pytańnie». Dy i hazieta prezidenckaj administracyi, kamientujučy Kudryna, zaznačaje: «…Najchutčej što ministr pastaviŭ ekanamičnyja ŭzajemadačynieńni ŭ pramuju zaležnaść ad ekstrannaha pryznańnia Minskam dziaržaŭnaści Abchazii i Paŭdniovaj Asiecii».

Pa-druhoje, minski raund vyśviatleńnia stasunkaŭ miž zaklatymi chaŭruśnikami jaskrava prailustravaŭ, našto Łukašenku spatrebiłasia Jeŭropa. Pry ŭsioj jahonaj nielubovi da kaštoŭnasnaha naboru demakratyj Staroha śvietu.

Narmalizacyja dačynieńniaŭ ź Jeŭropaj — paratunak ad maskoŭskaha cisku. Inačaj Kreml prosta razmaža pa ściency.

I heta — padstava zadumacca tym, kamu zdajecca, što zaraz Jeŭropa musić adnavić mur błakady, kab dapamahčy zvalić dyktaturu. Treba vyrazna bačyć, dzie kančajecca režym i dzie pačynajecca kraina. Kraina, jakuju my možam stracić.

Nie varta palić chatu, kab padsmažyć jaječniu.

Treciaja vysnova (tut navat nie treba być Bahdankievičam): biełaruskija finansy sapraŭdy voś-voś mohuć zaśpiavać ramansy. Rubiel ledźvie lipić. Tamu pasažy rasijskaha vice-premjera i ministra finansaŭ pra chutkuju niepłatazdolnaść Biełarusi vyklikali taki hnieŭ. «Aryja hościa» stała ŭdaram pad dychaŭku. Narod ža adrazu łamanuŭsia ŭ abmieńniki…

Ciapier tutejšyja dziaržaŭnyja ŚMI čychvościać jak Kudryna ŭ ampłua Kasandry, tak i, kaniečnie ž, apazicyju, katoraja nibyta skača ad radaści ŭ pradčuvańni defołtu Baćkaŭščyny. Maŭlaŭ, jakija ž vy patryjoty! Kranaje, što mientarami niezaležnictva stanoviacca tyja, chto nie tak daŭno zaklikaŭ źlicca z Rasijaj ŭ ekstazie «bratniaj intehracyi».

Kaniečnie, dobra, što tam narešcie dapiali: impierskaja pahroza — nie «tryźnieńnie BNF». Ale tady jakoha ražna praciahvajecie małacić u svaich drukavanych orhanach razvaroty na temu «sajuznaha budaŭnictva»? Što budujecie? Maŭzalej dla biełaruskaj niezaležnaści?

Falšyvyja słovy, jak i raniej, mutnaj płyńniu ljucca z vysokich trybun i refrenam hučać z uładnych ruparaŭ. Biełaruś budzie pad pahrozaj jak minimum pakul nie skončycca epocha Vialikaj Chłuśni.

Heta nie prosta mietafary. Tak, chłuśnia ŭ vyhladzie nahonki VUP lubym koštam — praklon savieckaj płanavaj haspadarki — prosta rujnuje zaraz ajčynnuju ekanomiku. Sistema praciahvaje tupa zahaniać sama siabie ŭ pastku.

Ekanamist Alena Rakava pa vynikach vizitu maskoŭskaj kamandy zaznačaje: «Ciažka skazać, čaho ŭ rasijskaj pazicyi bolej — hrubaha šantažu ci tonkaha raźliku. Adnak, pravodziačy ciapierašniuju ekanamičnuju palityku, to bok nie spyniajučy pradpryjemstvy, nie skaračajučy biudžet, biaskonca pazyčajučy hrošy, adsoŭvajučy balučyja reformy, urad robić ŭsio dziela paskareńnia straty Biełaruśsiu svajoj ekanamičnaj samastojnaści».

Što tady zastaniecca ad samastojnaści palityčnaj, vožyku zrazumieła.

• 0
• 0
• 0
• 0
• 0
• 0
• 0
• 0