Suśvietnyja ledaviki rastajuć chutčej, čym kali-kolviek za ŭsiu historyju nazirańniaŭ
Daśledavańni vyjavili, što za apošnija dziesiacihodździ Ziamla zhubiła lodu stolki, što jon moh by składać słoj taŭščynioj 100 mietraŭ na płoščy pamieram ź Vialikabrytaniju.
Ad Antarktydy da Arktyki suśvietnyja ldy rastajuć chutčej, čym za ŭsiu historyju navukovych nazirańniaŭ, zhodna ź niadaŭnimi źviestkami, atrymanymi sa spadarožnika, jaki padličyŭ kolkaść lodu, zhublenaha za apošni čas u vyniku źmieny klimatu, paviedamlaje vydańnie The Wall Street Journal.
Daśledavańnie pakazała, što ŭ pieryjad z 1994 da 2017 hoda Ziamla zhubiła prykładna 28 tryljonaŭ mietryčnych ton lodu. Heta kolkaść ekvivalentnaja taŭščyni ledzianoha pokryva ŭ 100 mietraŭ, što suadnosicca z płoščaj Vialikabrytanii. Tałaja vada padniała ŭzrovień mora ŭsiaho tolki na calu va ŭsim śviecie, adznačajuć navukoŭcy.
«Hetuju vializnuju kolkaść rastałaha lodu ciažka sabie ŭjavić», — kaža Tomas Słejter, navukovy supracoŭnik Centra palarnych nazirańniaŭ Univiersiteta Lidsa ŭ Vialikabrytanii i aŭtar artykuła, u jakim apisvajucca apošnija daśledavańni. «Lod adyhryvaje važnuju rolu ŭ rehulavańni hłabalnaha klimatu, a jaho imklivaje źmianšeńnie pryviadzie da bolš častych ekstremalnych źjaŭ nadvorja», — śćviardžaje daśledčyk.
Słejter i jaho kalehi, praanalizavaŭšy źviestki sa spadarožnika, vyjavili, što chutkaść hłabalnaha rastavańnia lodu pavialičyłasia na 65% z 90-ch hadoŭ minułaha stahodździa. Pa słovach navukoŭcaŭ, strata lodu paskoryłasia z 0,8 tryljona mietryčnych ton za hod da 1,3 praz pavieličeńnie tempieratury ŭ atmaśfiery i akijanie ŭ vyniku masavych vykidaŭ parnikovych hazaŭ.
Navukoŭcy vykarystoŭvali roznyja mietady, kab pryjści da takich vysnoŭ. Byli zadziejničanyja spadarožnikavyja vyšyniamiery i hravitacyjnyja sensary, a taksama zdymki ledavikoŭ sa spadarožnika, kab vyjavić źmieny za apošnija hady.
Ciapier čytajuć
Z prajekta budaŭnictva minskaha mietro vykinuli jašče dźvie stancyi — «Kijeŭski skvier» i «Politechničnuju»1
Kamientary