Coca-Cola źbirajecca pierajści na papiarovyja butelki
Coca-Cola źbirajecca vyprabavać pieršyja papiarovyja butelki ŭ miežach doŭhaterminovaj stratehii, nakiravanaj na stvareńnie ŭpakoŭki biez vykarystańnia płastyku.
Novuju ŭpakoŭku raspracavała dackaja kampanija Paper Bottle Company. Butelki vyrablenyja ź vielmi tryvałaha papiarovaha vałakna, za vyklučeńniem viečka i tonkaj płastykavaj miembrany, jakaja nie daje papiery sutykacca z vadkaściu. Biez płastykavaj miembrany jość ryzyka, što papiarovaja abałonka budzie źmianiać smak napoju, paviedamlaje BBC.
Tym nie mienš, kančatkovaja meta kampanii — stvaryć butelku całkam biez vykarystańnia płastyku, jakuju možna było b pieraapracoŭvać na 100% i jakaja b nie dapuskała ŭciečki hazu.
Inšyja hłabalnyja kampanii pa vytvorčaści napojaŭ padtrymlivajuć hety płan. Coca-Cola płanuje pierajści da biezadkidnaj vytvorčaści da 2030 hoda.
Letaś dabračynnaja arhanizacyja Break Free From Plastic pastaviła kampaniju na pieršaje miesca ŭ śviecie pa ŭzroŭni ŭniosku ŭ zabrudžvańnie płastykam, a śledam za joj raźmiaścilisia kampanii Pepsi i Nestle.
Hałoŭnaja zadača dackaj kampanii zaklučałasia ŭ tym, kab raspracavać butelku, jakaja b vytrymlivała napor hazaŭ: haziravanyja napoi raźlivajucca ŭ taru pad ciskam.
Akramia hetaha, nieabchodna było stvaryć płastyčny materyjał, jakomu možna było b nadavać patrebnuju formu i pamier u zaležnaści ad brendu napoju i na jakim možna było b drukavać firmovyja etykietki.
Praz 7 hadoŭ pracy kampanija Paper Bottle Company hatova pačać vyprabavańni novych butelek dla Coca-Cola pad nazvaj Adez. Pieršyja 2000 butelek płanujecca pradać praź miascovyja sietki roźničnaha handlu ŭ Vienhryi.
Paper Bottle Company taksama supracoŭničaje ź inšymi brendami. Viadomy šviedski vytvorca vodki Absolut u chutkim časie źbirajecca prateściravać novuju ekałahičnuju ŭpakoŭku. Takija ž płany i ŭ piŭnoj kampanii Carlsberg.
Adnak pa mierkavańni niekatorych ekśpiertaŭ, navat kali vyprabavańni papiarovych butelek projduć paśpiachova, doŭhi čas jany nie buduć mieć vialikaj papularnaści, bo płastykavyja butelki stali nieadjemnaj častkaj charčovaj industryi, a ŭ mnohich krainach jany całkam pierapracoŭvajucca. Da taho ž nie varta zabyvacca pra canu, bo płastykavyja butelki značna tańniejšyja i bolš zručnyja.
Ciapier čytajuć
Źjaviłasia jašče adno FOTA Mikoły Statkieviča paśla vyzvaleńnia2
Kamientary