Aktyvistu i błohieru Mikałaju Dziadku vystaŭlena kančatkovaje abvinavačańnie pa troch artykułach Kryminalnaha kodeksa. Jaho sprava nakiravanaja ŭ prakuraturu, piša Tut.by.
Dziadka vinavaciać pa troch artykułach: niezakonnyja dziejańni ŭ dačynieńni da haručych rečyvaŭ; arhanizacyja i padrychtoŭka dziejańniaŭ, jakija hruba parušajuć hramadski paradak; zakliki da dziejańniaŭ, nakiravanych na pryčynieńnie škody nacyjanalnaj biaśpiecy Biełarusi z dapamohaj internetu.
Mikałaj i jaho advakaty aznajomilisia z materyjałami spravy, paśla čaho jano było nakiravana ŭ prakuraturu.
— Pracedura takaja: prakuratura vyvučaje abvinavaŭčaje zaklučeńnie i zatym vyrašaje pytańnie, ci dastatkova padstaŭ dla nakiravańnia spravy ŭ sud, — raspaviadaje jaho baćka Alaksandr Dziadok. — Darečy, u vyniku aznajamleńnia sa spravaj advakat i Mikałaj vyjavili dziŭnuju reč. U pracesie jaho aryštu i pieratrusu ŭ jaho kanfiskoŭvali rečy, u tym liku tyja samyja butelki (SK paviedamlaŭ, što padčas pieratrusu ŭ jaho znajšli «šklanyja butelki z haruča-zmazačnymi materyjałami» — zaŭv. red.), hrošy. Ale ŭ pratakole pieratrusu adsutničaje častka rečaŭ, jakija ŭ Mikałaja tady zabrali. Heta fotaaparat Canon, štatyŭ da jaho, lichtaryki, 1 tysiača rubloŭ. Mikałaj paćviardžaje, što hetyja rečy ŭ jaho byli kanfiskavanyja, i heta budzie napisana ŭ adpaviednych chadajnictvach.
U Dziadka zastajucca niavyrašanymi pytańni sa zdaroŭjem: častyja hałaŭnyja boli i prablemy sa straŭnikam. Jon prasiŭ ab abśledavańni i praviadzieńni jamu fibrahastraskapii, jakija, pa słovach baćki, jamu nie pravodziać. Akramia hetaha, Mikałaj praktyčna nie atrymlivaje listoŭ, a blizkim ź pierabojami prychodzić karespandencyja ad jaho.
— Ja apošni list ad jaho atrymaŭ, datavany šostym krasavika. Mikałaj nie atrymaŭ nivodnaha lista ad siastry, adno joj viarnułasia, astatnija naohuł źnikli. Jaho de-fakta pazbavili prava atrymlivać i adpraŭlać listy. Jon byŭ na pryjomie ŭ prakurora pa nahladzie, jaki pryjazdžaŭ u SIZA, heta było bolš za 10 dzion tamu, toj abiacaŭ razabracca i pryniać miery, ale nijakich źmien nie adbyłosia, — dzielicca baćka Mikałaja.
Alaksandr Dziadok u svaju čarhu sprabavaŭ trapić na pryjom da načalnika SIZA № 1 3 maja, kab abmierkavać hetuju situacyju z synam, adnak u pryjomie jamu admovili i pryčynu nie patłumačyli, kaža jon.
Mikałaj nie pryznaje vinu. Baćka adznačaje, što «Mikałaj stavicca da hetaha jak da pieraśledu za jaho pohlady, pierakanańni, žadańnie kazać ludziam praŭdu».
Kamientary