NASA dasłała ŭ kosmas sardečnyja kletki. Voś jak heta moža dapamahčy miedycynie
U sakaviku 2020 hoda čarhovaja hruzavaja misija adpraviłasia ŭ šlach da Mižnarodnaj kaśmičnaj stancyi. Akramia ŭsiaho inšaha, na hruzavym šatle znachodzilisia kletki čałaviečaha serca.
Kletki praviali na MKS 22 dni, paśla čaho ich viarnuli na ziamlu — i bijeńnie ŭsio jašče praciahvałasia. Hety ekśpierymient prynios šmat karysnaj infarmacyi, jakaja moža dapamahčy pacyjentam z chvarobami serca. Im była pryśviečanaja niadaŭniaja panelnaja dyskusija pamiž astranaŭtkaj Džesikaj Mejr i amierykanskimi navukoŭcami, pra jakuju piša CNN.
U ekśpierymiencie, pra jaki idzie havorka, udzielničali sardečnyja kletki pad nazvaj kardyjomijacyty, vyraščanyja z płurypatentnych stvałavych kletak. Taki typ stvałavych kletak navukoŭcy ličać idealnym, bo ich možna pieratvaryć u kletki samych roznych typaŭ, u tym liku i ŭ zdarovyja sardečnyja kletki dla pacyjentaŭ z chvarobami serca.
U svaju čarhu, sardečnyja kletki mohuć dapamahčy ŭ lačeńni chvarob serca jak u vypadku ź dziećmi, tak i z darosłymi. Jany palapšajuć zdolnaść serca da rehienieracyi, a taksama spryjajuć bolšaj efiektyŭnaści tradycyjnych mietadaŭ lačeńnia. Ale, kab adnavić paškodžanaje serca, treba vielmi šmat kardyjomijacytaŭ. Navukoŭcy nazyvajuć ličbu jak minimum u miljard kletak na adnaho pacyjenta.
Vyjaviłasia, što ŭ kosmasie stvałavyja kletki rastuć chutčej, čym na Ziamli. Bolš za toje, kali źmiaścić kletki, jakija znachodziacca na Ziamli, va ŭmovy minimalnaj hravitacyi, kletki taksama rastuć bolš chutka. Možna spadziavacca, što dziakujučy hetamu navukoŭcy zdolejuć vyrabić mnostva zdarovych kardyjomijacytaŭ dla ludziej z chvarobami serca, u tym liku i vyraścić dla pacyjentaŭ z paškodžanym sercam jaho frahmienty z ułasnych kletak hetych pacyjentaŭ.
Taksama daśledavańnie «kaśmičnych» kardyjomijacytaŭ moža dapamahčy navukoŭcam lepš zrazumieć miechaniku zdarovaha serca i praces stareńnia. Na takich kletkach možna budzie vypraboŭvać leki abo inšyja mietady lačeńnia, kab nie padviarhać niebiaśpiecy pacyjenta, kamu hetyja kletki naležać.
Ciapier čytajuć
Maksim Znak naviedaŭ śpiektakl «Zekamieron», pastaŭleny pa jahonaj knizie, napisanaj u SIZA4
Kamientary