Łatvija haryć ad kavidu. A miascovyja, kab nie rabić pryščepki, hatovyja za hrošy zaražacca virusam
Apošnim časam u Łatvii, dzie nadzvyčaj ciažkaja situacyja z karanavirusam, raspaŭsiudziłasia niezvyčajnaja źjava — miascovyja žychary hatovyja płacić hrošy ludziam, jakija chvarejuć, kab zarazicca ad ich, atrymać imunitet i nie rabić pryščepki. Abjavy źjaŭlajucca prosta ŭ presie. Palicyja ličyć heta parušeńniem zakonu i maje namier zmahacca.
Siužet pra heta vyjšaŭ na telekanale LTV. Žurnalist znajšoŭ abviestku žančyny, jakaja šukaje chvoraha, i źviazaŭsia ź joj.
Hierainiaj akazałasia 53-hadovaja nastaŭnica, jakaja raspaviała, što ličyć, što i ŭ jaje, i jaje kaleh mocny imunitet, tamu raźličvaje pieranieści zachvorvańnie ŭ lohkaj formie. Za pasłuhu «zarazicca» łatvijcy hatovyja płacić ad 100 jeŭra i bolš.
Nastaŭnica raskazała žurnalistu, što taksama sprabavała kupić padrobleny siertyfikat ab vakcynacyi, ale heta ŭ jaje nie atrymałasia.
Karespandent udakładniŭ, što jana źbirajecca rabić praz paŭhoda, kali rekamiendujecca vakcynavacca iznoŭ. Nastaŭnica spadziajecca, što niešta źmienicca, naprykład, budzie inšy ŭrad abo jana zarazicca paŭtorna. Rabić pryščepku žančyna kateharyčna nie choča.
U palicyi ab prablemie viedajuć i źviartajuć uvahu, što takija dziejańni kvalifikujucca jak staŭleńnie pad pahrozu niebiaśpieki siabie i ludziej navokał, heta viadzie da administracyjnaj i, pry peŭnych abstavinach, kryminalnaj adkaznaści.
Za śviadomaje zaražeńnie kavidam u Łatvii praduhledžany sankcyi — ad štrafu da pazbaŭleńnia svabody (maksimum na piać hod).
Nahadajem, za apošni tydzień kolkaść chvorych na kavid u Łatvii vyrasła amal na 49%. Takim čynam, kraina vyjšła na pieršaje miesca ŭ śviecie pa tempach zachvorvańnia. Rost zachvorvańnia nazirajecca va ŭsich uzrostavych hrupach, u tym liku siarod školnikaŭ.
Na siońnia ŭ Łatvii majuć vakcynu 50% žycharoŭ. Siarod chvorych 79% nie pryščapilisia abo mieli tolki adnu dozu vakcyny. Praz toje, što balnicy pierahružanyja, płanavaja miedycynskaja dapamoha prypynienaja na try miesiacy.
Z 20 kastryčnika da 15 listapada ŭviedzieny łakdaŭn, adnak zabarony na padarožžy niama. Łatvijskija ŭłady tłumačać, što zaraz miascovyja žychary bolš niebiaśpiečnyja dla inšych krain, čym zamiežniki dla łatvijcaŭ.
Čytajcie taksama:
«Vaźmicie Łatviju». Nasamreč, lišniaja śmiarotnaść ad kavidu ŭ Łatvii ŭ piać razoŭ mienšaja, čym u Biełarusi
Ciapier čytajuć
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja90
Kamientary