#mianiajukavunapałac. Aktyvisty prydumali, jak kožny moža lohka paŭdzielničać u ratavańni pałaca Radziviłaŭ
Letaś u byłoha pałaca Radziviłaŭ u vioscy Pałaniečka, što ŭ Baranavickim rajonie, źjavilisia novyja haspadary. Jaho vykupiła siamja pradprymalnikaŭ ź Minska, jakija pastavili sabie zadaču nie dać pałacu źniknuć i adnavić jaho. Dapamahčy im u hetym moža kožny biełarus — prosta ciapier dastatkova pieraličyć na rachunak pałaca košt adnaho kubka kavy.
Pałac viadzie svaju historyju z XVIII stahodździa: jon byŭ pabudavany pa zahadzie Macieja Radziviła. Budynak pieražyŭ niekalki pažaraŭ, paśla vajny vykarystoŭvaŭsia ŭ jakaści škoły-internata, a z 1999 hoda pustavaŭ i ŭsio bolš razburaŭsia.
Praces adnaŭleńnia pałaca zaciažny i składany, tym bolš kali ŭličyć, u jakim drennym stanie jon zachavaŭsia: u ścieny daŭno pačali ŭrastać drevy, interjer razburany na 90%. Ale novyja haspadary nastrojenyja surjozna: užo było praviedziena abśledavańnie techničnaha stanu budynka, kab pierajści na nastupny etap — prajektnyja raboty. Kamanda prajekta admysłova šukała archiŭnyja fotazdymki i dakumienty, kab u budučyni budynak byŭ maksimalna padobny da aryhinału.
Pałac, 1917 hod.
Akurat na vykanańnie prajektna-daśledčych rabot siońnia i źbirajucca hrošy.
«Na 19 kastryčnika pa damovie z «BrestInśpiektam» za vykanańnie prac była vystaŭlenaja suma dla apłaty na 21 811,66 rubla. Užo spłačana 6490,39 rubla. Ciapier nam nieabchodna 15 321,27 rubla dla zakryćcia hetaj damovy. Pałac maje vostruju patrebu ŭ padtrymcy, i my vyrašyli zapuścić akcyju #mianiajukavunapałac. U našych sacyjalnych sietkach bolš za piać tysiač padpisantaŭ, i kali b kožny pamianiaŭ niedzie try rubli za kavu na dapamohu ŭ adnaŭleńni pałaca — heta dapamahło b prasunucca dalej u našaj ahulnaj spravie», — napisana ŭ aficyjnym akaŭncie pałaca Radziviłaŭ u Pałaniečcy.
Pieraličyć hrošy na adnaŭleńnie pałaca možna praz ARIP:
Dabračynnaść, hramadskija abjadnańni — Inšyja hramadskija abjadnańni — Adnaŭleńnie pałaca ŭ Pałaniečcy.
Raźviedka ZŠA: Biełaruś stała pieradavym vajskovym płacdarmam Rasii24
Kamientary