Dva hady «chimii» za dva karotkija słovy. U Rahačovie sudzili 33-hadovaha kiroŭcu
22 śniežnia ŭ sudzie Rahačoŭskaha rajona sudzili 33-hadovaha miascovaha žychara Alaksandra Kandorskaha. Jon pracuje kiroŭcam-ekśpiedytaram u pryvatnaj firmie, maje dvuch dziaciej i vielmi dobryja charaktarystyki. Ale, niahledziačy na heta, atrymaŭ dva hady «chimii».
Kryminalnaja sprava była raspačataja ŭ minułym hodzie. Pad videa pra razhon mirnaj akcyi, jakoje raźmiaściła ŭ svaim paście ŭ «Adnakłaśnikach» Volha Karač, Alaksandr napisaŭ karotki niehatyŭny kamientar «na koł». Niehatyŭny kamientar byŭ pad tym pastom daloka nie adziny, usiaho ich nabrałasia 1870. Ale daišnik z Hancavič Ihar Volnič vyrašyŭ źviarnuć uvahu mienavita na hety.
Volniča, za «abrazy» jakoha sudzili ludziej i raniej, padčas suda apytali pa skajpie. Jon śćviardžaŭ, što kamientar Kandorskaha pryčyniŭ jamu takija «kryŭdu, soram, horyč, abureńnie», što daviałosia navat źviarnucca pa dapamohu da psichołaha. U jakaści maralnaj kampiensacyi Volnič zapatrabavaŭ 1500 rubloŭ.
U chodzie śledstva kamientar adpravili na linhvistyčnuju ekśpiertyzu, jakaja kanstatavała, što ŭ im «niama elemientaŭ ahresii i zakliku da hvałtu». Ale dziaržabvinavaŭca paličyŭ, što ŭ adnosinach da Volniča ździejśnili złačynstva, «vyjaŭlenaje va ŭzbudžeńni palityčnaj varožaści»
U vyniku Alaksandra Kandorskaha pryznali vinavatym u ździajśnieńni złačynstva pa art. 369 «Abraza pradstaŭnika ŭłady» i prysudzili da dvuch hadoŭ abmiežavańnia voli z nakiravańniem u papraŭčuju ŭstanovu adkrytaha typu.
Prysud vyniesła sudździa Iryna Pradun, proźvišča dziaržaŭnaha abvinavaŭcy — Papoŭ.
Kamientary