Pavieł Vinahradaŭ napisaŭ tekst na vypadak svajho zatrymańnia, dzie raspavioŭ, čym dapamahčy jamu i siamji
Paŭła Vinahradava zatrymali na minułym tydni. Jaho abvinavačvajuć pa troch artykułach Kryminalnaha kodeksa za post u fejsbuku. Na vypadak zatrymańnia jon napisaŭ dopis, jaki siońnia źjaviŭsia na jaho staroncy.
«Hałoŭnaje majo pieražyvańnie ŭ kaziematach — heta nie sam fakt taho, što ja ŭ kaziematach, a «jak tam maje biez tatki?» Bo raniej tata byŭ krynicaj dachodaŭ i ŭsialakim pamočnikam, a ciapier tatka — krynica vydatkaŭ i krynica hiemaroju.
Dla Śviatłany trochi napružana adkazvać na pytańnie «čym dapamahčy?» i prasić, a mnie, voś, mienš napružana. Raspaviadaju čym dapamahčy i prašu:
1) «maje lubimyja pryvitańni — heta sała i cukierki». Heta značyć hrošy. Doŭha padbiraŭ słovy, kab niejak rastłumačyć situacyju, ale rastłumaču, mabyć, biez padboru. My — nie žabraki, u kłasičnym razumieńni hetaha słova. Nichto nie budzie haładać, zamiarzać, stajać na papierci i ŭsio takoje. Dla Bierazino my całkam norm. Tamu, kali vy sabralisia adryvać vašy apošnija ad siabie ź miasam, to, kali łaska, nie treba. Prosta mnie nie pryjemnaja sama dumka ab tym, jakija finansavyja ciažkaści moža vyklikać ŭvieś hety horki kataklizm. A jašče ja chaču chadzić pa kamiery z dumkaj: «Hlań! Ty mianie siudy pasadziŭ, a jany mianie padtrymlivajuć», i ŭśmichacca, uśmichacca, uśmichacca.
2) Napišycie mnie list. Raskažycie mnie pra svajho kata, jak vam druhi siezon Viedźmaka, abo što tam u vas z vašym vybuchovym mietearyzmam. A potym kajfanicie ad taho, što vam pryjšoŭ adkaz. (Nu, ci nie pryjšoŭ. My ž u Biełarusi.)
Ja vyjdu. Kolki b tam mnie nie nabałtali. Cukierki vy viedajecie kudy nieści. A voś adras majoj ciapierašniaj kvatery, tak skazać (ale jon budzie mianiacca). 223311 Minskaja vobłaść, Bierazino, IČU»
***
Paŭłu Vinahradavu vystaŭlenyja abvinavačvańni pa nastupnych artykułach: 130 — Raspalvańnie rasavaj, nacyjanalnaj, relihijnaj abo inšaj sacyjalnaj varožaści; 367 — Paklop na prezidenta; 342 — Arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich.
Pavieł — viadomy błohier, žyvie ŭ Bierazino, byŭ dvojčy asudžany, u 2008-m i 2011 hadach, palitviazień. U lipieni 2021 hoda byŭ asudžany na 30 sutak, jaho telehram-kanał byŭ pryznany ekstremisckim.
«Vaš kanał pryznali ekstremiścičeskim». Fiejeryčny apovied Paŭła Vinahradava pra 48 sutak i mahčymaść emihracyi
«Arabski šejch zasunuŭ dalary ŭ kišeniu». Błohier Vadimati Jermašuk ciapier pracuje achoŭnikam luksavych bucikoŭ3
Kamientary