«Heta mnie — śmiarotny prysud»: 69-hadovuju piensijanierku asudzili da 2,5 hoda kałonii za kamientaryi
Sud Bierastavicy i Bierastavickaha rajona asudziŭ 69-hadovuju piensijanierku z Vaŭkavyska Halinu Ivanaŭnu Michalčuk da 2,5 hoda kałonii ahulnaha režymu za kamientaryi ŭ telehram-kanale.
Ahułam paciarpiełyja acanili svaje maralnyja pakuty ŭ 5000 rubloŭ — pry hetym abvinavačanaja maje piensiju ŭ 500 rubleŭ. Abaronca paprasiła vyklikać paciarpiełych na praces, bo jany nie paznačyli, jakija mienavita maralnyja pakuty pieražyli, paviedamlajuć pravaabaroncy.
Sudździa Andrej Tałočka: «Jak vy sabie heta ŭjaŭlajecie? Što jany pryjeduć, pakul abied? (śmiajecca)».
Abaronca: «A što tut takoha? 60 kiłamietraŭ. Zajaŭlena 1500 iskavych patrabavańniaŭ».
Dziaržabvinavaŭca Ała Kuźma: «A što, heta vialikaja suma?»
Abaronca: «Što na heta pavinien adkazać abaronca čałavieka, jaki atrymlivaje piensiju ŭ 500 rubloŭ?»
Žančynu sudzili za šerah kamientaryjeŭ, jakija niehatyŭna i źniavažliva aceńvali Łukašenku, a taksama źnievažali jaho honar i hodnaść.
Taksama paciarpiełymi vystupili staršynia Vałkavyskaha rajvykankama Michaił Sićko (adziny, chto nie zajaviŭ isk na kampiensacyju maralnaj škody), milicyjantki AMAP Hrodzienskaha UUS Darja Bandarčuk i Maryja Mazurkievič (zajavili iski pa 1000 rubloŭ), načalnik PPS Vałkavyskaha RAUS Valeryj Ramančyk (isk — 1500 rubloŭ), načalnik Vaŭkavyskaha RAUS Vital Asocki (isk — 1500 rubloŭ).
Taksama, zhodna z abvinavačańniem, jana ździejśniła paklop u dačynieńni da byłoha načalnika HUBAZiKa Mikałaja Karpiankova, eks-ministra MUS Juryja Karajeva, eks-kiraŭnicy administracyi Natalli Kačanavaj, a taksama milicyjantki roty PPS Frunzienskaha RAUS Minska Vałujskaj, adnak jany admovilisia pisać zajavy, pavodle jakich musiać być zaviedzienyja kryminalnyja spravy.
Žančyna taksama pakidała niehatyŭnyja kamientaryi ŭ dačynieńni da ich.
Halina Ivanaŭna ŭ apošnim słovie skazała, što pazbaŭleńnie voli stanie dla jaje śmiarotnym prysudam, adnak sudździa Andrej Tałočka pryznačyŭ joj 2,5 hoda kałonii.
Ciapier čytajuć
U dzień, kali pamiłavali palitviaźnia Daronina, jahonaj žoncy prysudzili 8,5 hadoŭ kałonii za ŭdzieł u dvarovym čacie6
Kamientary