Džazmen z Kyrhyzstana ŭsio ž pryznaŭsia, što jaho katavali ŭ Kazachstanie, i raspavioŭ, za što ŭdziačny kazachskim «azaronkam»
Viadomy kyrhyzski džazavy muzykant Vikram Ruzachunaŭ, jakoha raniej dziaržaŭnyja ŚMI Kazachstana sprabavali vydać za adnaho z ałmacinskich pahromščykaŭ, pryznaŭ, što jaho katavali, a taksama vykazaŭ słovy «padziaki» kazachstanskamu dziaržtelebačańniu, piša KazTAH.
«Ja ad usiaho serca chaču padziakavać usim, chto ščyra spačuvaŭi i spryjaŭ majmu vyzvaleńniu.
I pačnu z kazachstanskaha TB… Tak-tak, dziakuj vam.
Kali b nie intervju, nichto b nie daviedaŭsia, dzie ja i što sa mnoj. Dziakujučy vam, razumnyja ludzi va ŭsim śviecie zmahli zrazumieć realii taho, što adbyvajecca, zrabić ćviarozuju acenku padziej u Kazachstanie. Choć ja kazaŭ žurnalistam, što nichto nie pavieryć i ŭ mianie jość praca ŭ Kyrhyzstanie, ale jany nie pasłuchali… Dziakuj tamu čałavieku, jaki z sotniaŭ nieabhruntavana zatrymanych, nievinavatych, abraŭ mienavita mianie, prymusiŭ zavučyć scenaryj i pierakazać na kamieru»,
— napisaŭ Ruzachunaŭ u čaćvier na svajoj staroncy ŭ adnoj z sacsietak.
Jak adznačyŭ muzykant, pa acency daktaroŭ, jamu zastavałasia niadoŭha.
«Učora byŭ apošni dzień samaizalacyi, a siońnia pieršy dzień majho novaha žyćcia, jaki padzielić pieryjad «da» i «paśla» studzieńskich padziej u Kazachstanie. ( … )
Złamanyja rebry ŭžo paškodzili levaje lohkaje, nie chapiła paru udaraŭ, kab paškodzić serca…
Tym časam u śviecie — rodnyja, siabry, kalehi i ŭsie, chto apaznaŭ mianie na videa, pačali aktyŭna repościć infu, što vyklikała rezanans, jaki padchapili błohiery, ŚMI i pravaabaroncy. Dziakujučy majmu siabru, a ciapier, pa pravie i aniołu-achoŭniku — Julii Ruckaj, la pasolstva Kazachstana ŭ Kyrhyzstanie byŭ arhanizavany mirny mitynh. Deputat Dastan Biekiešaŭ u svaim Instahramie prapanavaŭ apłacić advakataŭ u Kazachstanie. Suzasnavalnik rasijskaj kampanii «Formuła trafiku» Maksim Čyrkoŭ prapanoŭvaŭ lubuju sumu, aby mianie adpuścili», — dadaŭ jon.
Taksama džazmen adznačyŭ, što da spravy padklučylisia prezident Kyrhyzstana Sadyr Žaparaŭ, a taksama kiraŭnik Dziaržaŭnaha kamiteta nacyjanalnaj biaśpieki Kačmybiek Tašyjeŭ, jakija pravieryli jaho pa ŭsich kanałach i paćvierdzili jaho niedatyčnaść da biesparadkaŭ.
9 studzienia dziaržaŭnaje telebačańnie Kazachstana pakazała źbitaha mužčynu, jaki śćviardžaŭ, što 2 studzienia jamu kupili kvitok da Ałmaty i jon pryjechaŭ z Kyrhyzstana, kab zarabić hrošy za ŭdzieł u mitynhach. U mužčynie amal adrazu ž paznali kyrhyzskaha muzykanta Vikrama Ruzachunava, akramia taho, śpiecsłužby Kyrhyzstana paviedamili, što kvitok džaźmiena ŭ Ałmaty byŭ nabyty jašče 16 śniežnia.
Paśla skandału Ruzachunaŭ byŭ adpuščany na radzimu, a dziaržaŭnyja ŚMI paśpiešliva vydalili ŭsie videa z muzykam.
Kamientary