Ejlin Hu — sapraŭdny fienomien hetych Hulniaŭ. 18-hadovaja spartsmienka vystupaje ŭ łyžnym frystajle i ŭžo zavajavała dla krainy try miedali ŭ jaho roznych vidach (dva zołata i srebra). Hu stała pieršaj spartsmienkaj, jakoj spatrebilisia dla hetaha tolki adny Hulni.
Hu naradziłasia ŭ amierykanskim San-Francyska. Jaje maci — kitajanka, baćka — amierykaniec. U 2019 hodzie dziaŭčyna vyrašyła vystupać za kitajskuju zbornuju na Hulniach-2022, i damašniaja Alimpijada stała dla Hu sapraŭdnym zornym časam.
U Kitai lubiać Ejlin. Tam jaje tvar možna ŭbačyć na rekłamnych biłbordach (Hu jašče i pracuje madellu), zastaŭkach mabilnych dadatkaŭ i vokładkach časopisaŭ pa ŭsioj krainie. Hu maje kantrakty bolš čym z 30 brendami jak u samim Kitai, tak i za jaho miežami. Heta kampanii samych roznych siektaraŭ: luksavyja hadzińniki, mašyny, kaśmietyka, małako, mabilnyja prahramy i hetak dalej.
Kitajski ŭrad doŭha abmiažoŭvaŭ spartsmienaŭ zbornych u mahčymaści zdymacca dla rekłamy. Rekłamnyja kantrakty treba było ŭzhadniać z vyšejšym kiraŭnictvam, i vialikuju častku prybytku ad ich zabirała dziaržava. Takija patrabavańni asłabili zusim niadaŭna, i pakul nieviadoma, nakolki Hu vymušanaja ich vykonvać.
Ale ž u Kitai ciapier čuvać i krytyku ŭ adras Ejlin. Miascovyja žychary nie viedajuć, ci aznačaje jaje pośpiech niešta dla prostych kitajcaŭ, i źviazvajuć jaho chutčej z unikalnym vychavańniem dziaŭčyny, jakoje ŭ Padniabiesnaj dastupnaje nie ŭsim.
Sapraŭdy, maci Ejlin, jakaja zarablała na biržy ŭ Ńju-Jorku, prykłała šmat namahańniaŭ, kab zabiaśpiečyć dačcy naležnuju karjeru. Hu vučyłasia ŭ pryvatnaj škole, na vychadnych jaje pa vosiem hadzin vazili na spartovyja treniroŭki, nie kažučy ŭžo pra dostup da darahoj fizijaterapii ŭ vypadku traŭmaŭ. Bolšaść žycharoŭ Padniabiesnaj nie majuć takich mahčymaściaŭ.
Ejlin taksama krytykujuć za toje, što jana nie žadaje ŭzdymać prablemu parušeńnia pravoŭ čałavieka ŭ Kitai, i praz heta robicca zbrojaj prapahandy miascovaha ŭrada. Reparcioram jana tłumačyć heta tak: «Ja nie žadaju vyrašać palityčnyja prablemy prosta ciapier… I ja viedaju, što ja nie mahu rabić usio, što ja chacieła b rabić, u hety samy momant».
Kali ž u Ejlin spytali jaje mierkavańnie pra toje, što ŭ krainie zabłakavany Instagram, spartsmienka prosta paraiła karystacca VPN-prahramami dla abychodu błakiroŭki.
Inšyja ž kitajcy, naadvarot, ličać, što Ejlin nadaje aficyjnamu Kitaju zanadta mała ŭvahi. Naprykład, jaje krytykavali za toje, što jana niedastatkova chutka raźviarnuła ściah krainy paśla taho, jak vyjhrała na Alimpijadzie srebra.
Inšaja prablema — nacyjanalny status dziaŭčyny. U Kitai nie dazvolena mieć dvajnoje hramadzianstva, ale Ejlin nikoli nie kazała pra toje, ci admoviłasia jana ad amierykanskaha pašparta.
Kamientary