Pa ŭsioj krainie zatrymali kala 30 artapiedaŭ-traŭmatołahaŭ
Jak stała viadoma «Našaj Nivie», u minułuju piatnicu amal adnamomantna ŭ roznych rehijonach zatrymali try dziasiatki artapiedaŭ-traŭmatołahaŭ. Heta bolšaść kiraŭnikoŭ traŭmatałahičnych adździaleńniaŭ.
«Vidavočna, što takuju kolkaść miedykaŭ nadoŭha pasadzić niemahčyma, tamu niejki čas pakašmarać, nabiaruć pakazańniaŭ na pryznačanych «kazłami» i bolšaść vypuściać, ale niechta pryziamlicca nadoŭha. Ahułam usio heta katastrofa dla miedycyny», — prahnazuje raźvićcio spravy adzin z našych surazmoŭcaŭ.
Jasnaści nakont taho, što stała pryčynaj, pakul niama. Ale surazmoŭcy vykazvajuć zdahadku, što heta moža być niejak źviazana z pratezavańniem sustavaŭ — za minułyja hady ŭ hetaj śfiery nazapasilisia prablemy.
«Na kalehijach artapiedaŭ padymałasia pytańnie kolkaści praterminavanaj pradukcyi na składach — jaje tam na miljony. Pratezy, umoŭna, jak abutak — jość papularnyja pamiery, jakija chutka razychodziacca, jość małazapatrabavanyja. U kožnaha prateza pry hetym jość termin sterylnaści, da jakoha jaho treba pastavić. I byli pytańni da tych abjomaŭ umoŭnaha «nielikvidu», jakija śpisvajucca.
Ale buchhałteryja nie viedaje, jakija tam terminy prydatnaści, heta ŭ bazy nie ŭnosicca, tamu na bałansie pratez jak by jość, ale kali jaho treba ŭziać — jon akazvajecca nieprydatny, treba zakuplać novy. Tam vialikija abjomy praterminoŭvańnia (heta toje, što hučała na kalehijach), ale nie zusim jasna, pryčym tut kankretna miedyki. Kali havorym pra razbazarvańnie srodkaŭ i ŭlik prydatnaści, to heta chutčej da buchhałteryj, adździełaŭ zakupak», — razvažaje čałaviek sa śfiery.
Padčas kavidu, kali admianili płanavyja apieracyi, zakupki pratezaŭ amal nie pravodzilisia — zbolšaha tolki dla ankałahičnych chvorych, jakija nie mohuć ciarpieć.
«Faktyčna ciapier ludzi, jakija stajać u čarzie na płanavuju zamienu sustava, nie viedajuć, što, chutčej za ŭsio, apieracyi nie budzie, bo niama zakupak, a pratezy na składach, jakija jość na papiery, nasamreč nieprydatnyja.
Z uvozam impartu taksama vialikija prablemy praz łahistyku i admovy supracoŭničać. U samoj Biełarusi robiacca tolki endapratezy ściahna, a kalena, naprykład, nie robiacca — tam usio impart. Dy i naš miascovy biełaruski vytvorca taksama z prablemami: mietał, ź jakoha robiać pratezy, nie kupiš na BMZ, heta śpiecyjalnyja mietały, jakija pa standartach źjaŭlajucca tavaram dvajnoha pryznačeńnia. Nakolki ja viedaju, zhodna z sankcyjami, pastaŭki zabaronienyja, navat nie viedaju, što ciapier ź imi budzie.
Nu i dadamo siudy toje, što pratezy nie viečnyja, ich treba z časam mianiać, prynamsi asobnyja składniki: hałoŭki, čašački i hetak dalej. A tut skłałasia situacyja, što papiarednija hady dziaržava zakuplała, umoŭna, niamieckija, a potym amierykanskija. Ich detali nie padychodziać adzin da adnaho, uvieźci detal aficyjna, ad balnicy, ciapier vielmi składana, čałaviek chodzić biez zamieny i litaralna razvalvajecca.
U takich vypadkach doktar moža paraić, jak uvieźci niejkuju detal «pa-čornamu», dzie ŭziać — schiemy dla štučnych uvozaŭ isnujuć, intares urača tut taksama moža isnavać, ja nie budu heta kamientavać, ale heta realii. Ale i masštaby ŭ takoj źjavy nievialikija. U lubym razie, tut pytańni da sistemy, jakaja skłałasia, a nie da tych, chto reža», — kaža surazmoŭca.
Učora zerkalo.io paviedamlała pra zatrymańnie troch viadučych traŭmatołahaŭ u Viciebsku. Heta supracoŭnik VDMU i hałoŭny pazaštatny traŭmatołah-artapied Viciebskaj vobłaści Kanstancin Bałaboška, zahadčyk traŭmatałahičnaha adździaleńnia Viciebskaj abłasnoj kliničnaj balnicy Andrej Kryłoŭ i zahadčyk traŭmatałahičnaha adździaleńnia BCHMD u Viciebsku Alaksandr Carkoŭski.
Pra zatrymańni ŭ Homieli pisała vydańnie «Fłahštok». Tam zabrali dvuch zahadčykaŭ adździaleńniaŭ traŭmatałohii — u abłasnoj kliničnaj balnicy i abłasnoj ankałohii. Taksama zatrymanyja try traŭmatołahi z Mazyrskaj CRB.
«Našaj Nivie» viadoma taksama, što zatrymany zahadčyk traŭmatałahičnaha adździaleńnia ŭ Vaŭkavysku Jaŭhien Saŭko.
«Naša Niva» adnaŭlaje zbor danataŭ — padtrymać prosta
Maksim Znak naviedaŭ śpiektakl «Zekamieron», pastaŭleny pa jahonaj knizie, napisanaj u SIZA4
Kamientary