Padčas vajny ŭ Nahornym Karabachu i rasijska-ŭkrainskaj vajny na ŭvieś śviet prahrymieli tureckija bieśpiłotniki «Bajraktar». Na dumku mnohich vajskovych śpiecyjalistaŭ i ahladalnikaŭ, drony ŭnieśli istotnyja źmieny ŭ pryncypy viadzieńnia vajny. Cikava, što Turcyja (jakaja stała adnym z suśvietnych lidaraŭ u vytvorčaści vajskovych bieśpiłotnikaŭ) maje ambitnyja płany i na bieśpiłotnyja viertaloty.
Tureckaja armija ŭ chutkim časie atrymaje pieršyja bieśpiłotnyja viertaloty, jakija buduć vykarystoŭvacca dla vykanańnia zadač raźviedki, bajavoha patrulavańnia, dastaŭki ŭzbrajeńnia i hruzaŭ.
Pieršyja takija viertaloty sa štučnym intelektam pačnuć vykarystoŭvacca armijaj u baraćbie z kurdskimi paŭstancami.
Adnoj ź pieravah bieśpiłotnaha viertalota u paraŭnańni sa zvyčajnymi dronami źjaŭlajecca mahčymaść palotaŭ pad abłokami, što dazvalaje vykarystoŭvać jaho ŭ lubych umovach nadvorja. Razam z vyrašeńniem vajennych zadač bieśpiłotnik moža taksama vykarystoŭvacca dla tušeńnia lasnych pažaraŭ, u sielskaj haspadarcy, dla achovy cyvilnych abjektaŭ.
Zapyty na nabyćcio bieśpiłotnika pastupajuć z-za miažy, hałoŭnym čynam ad naftazdabyvajučych krain.
Vaha bieśpiłotnaha viertalota składaje 250 kh, anałahičnaj jość i jaho karysnaja nahruzka. Jon zdolny znachodzicca ŭ pavietry na praciahu 8 hadzin i ździajśniać paloty na vyšyni 6,5 km.
Havorka idzie pra madel Alpin kampanii TITRA. Madel pieršapačatkova vykarystoŭvałasia ŭ cyvilnych misijach (dla tušeńnia lasnych pažaraŭ), ale budzie madernizavanaja dla vajennych misij.
Pierapracavany viertalot budzie vykarystoŭvacca ŭ pieršuju čarhu dla materyjalna-techničnaj padtrymki, raźviedki i atrymańnia fatahrafij.
U kampanii zaraz pracujuć nad raspracoŭkaj i inšych bieśpiłotnych sistem.
Buduć roznyja madyfikacyi viertalota. Viertalot abstalujuć nie tolki zbrojaj i bojeprypasami, ale i inšymi sistemami dy karysnym hruzam.
Kampanija zacikaŭlenaja ŭ intehracyi roznych vidaŭ ciažkaha ŭzbrajeńnia, ale pryjarytetam źjaŭlajecca takaja zbroja, jak rakiety abo reaktyŭnyja snarady. Usie hetyja płany buduć uvasoblenyja ŭ žyćcio ŭ 2023 hodzie, a pakul što pryjarytet inžynieraŭ — padahnać Alpine pad vajenna-łahistyčnyja patreby armii.
Nastupnaja madel, jakaja moža pastupić na ŭzbrajeńnie tureckaj armii — T629, vytvorca — kampanija Turkish Aerospace Industries, jakija raspracoŭvaje aparaty dla tureckaj armii.
Pratatyp upieršyniu byŭ prademanstravany jašče ŭ 2021 hodzie, a ŭvohule nad prajektam pracujuć z 2017-ha.
T629 budzie važyć 6 ton i budzie abstalavany 70-mm niekiravalnymi rakietami i supraćtankavymi rakietami L-UMTAS.
T629 pryznačany dla vykarystańnia ŭ jakaści płatformy dla pošukava-vyratavalnaj, supraćkarabielnaj i supraćłodkavaj baraćby, a taksama dla padtrymki isnujučych u Turcyi piłatavanych viertalotaŭ T129 ATAK pry vykanańni słužbovych i raźviedvalnych zadač.
Viertalot pastupić na ŭzbrajeńnie taksama ŭ 2023 hodzie.
Kab źnizić vydatki na raspracoŭku i vytvorčaść, T629 vykarystoŭvaje mnohija kampanienty viertalota T625 Gökbey.
Dyzajnam T629 nahadvaje piłatavany T129 ATAK, ale jon maje karysnuju nahruzku na adnu tonu bolšuju.
Ciapier čytajuć
Pamiatajecie paru studentki i vykładčyka, dzie jon starejšy na 31 hod? Akazvajecca, jon byŭ śviatarom, a jana vučyłasia na rehientku20
Kamientary