Kiłamietr maskoŭskaj kalcavoj kaštavaŭ bolš, čym kiłamietr tunelu pad Ła-Manšam ci navat kiłamietr supiersučasnaha adronnaha kałajdera.
Kiłamietr dabudavanaj niadaŭna la Maskvy abchadnoj darohi kaštavaŭ 537 milijonaŭ dołaraŭ.
Heta bolš, čym košt kiłamietru tunelu pad Ła-Manšam ci navat kiłamietru supiersučasnaha vialikaha adronnaha kałajdera, pabudavanaha na miažy Francyi i Šviejcaryi.
U lubimaj pieśni mera Juryja Łužkova, jakaja hučyć z vuličnych dynamikaŭ padčas kožnaha maskoŭskaha śviata, paŭtarajecca prypieŭ: «Darahaja maja stalica, załataja maja Maskva». I nasamreč Maskva, jakoj Juryj Łužkoŭ kiruje užo 17 hod, stolki ž, kolki hiensiek Leanid Brežnieŭ kiravaŭ Savieckim Sajuzam, rekordna darahaja.
Niadaŭna Barys Niamcoŭ, były vicepremjer, a siońnia adzin z kiraŭnikoŭ apazicyjnaha ruchu «Salidarnaść», apublikavaŭ rapart «Łužkoŭ. Vyniki», u jakim zanatavaŭ maskoŭskija rekordy. Apošnim časam Maskva była samym darahim horadam śvietu. U hetym hodzie, paśla nadychodu finansavaha kryzisa, stalica apuściłasia časova na treciaje miesca – bolš na žyllo, charčavańnie, transpart, nieabchodnyja pasłuhi vydatkoŭvali tolki žychary Tokio i Osaki.
A voś u rejtynhu jakaści žyćcia siarod suśvietnych miehapolisaŭ Maskva apynułasia na 171 miescy – pa susiedstvie ź zimbabvijskim Charare i nihieryjskim Łahasam.U rekordna darahoj stalicy taksama rekordnyja i ceny na nieruchomaść. Žychar Maskvy ź siarednim zarobkam za siaredniuju 54-mietrovuju kvateru pavinien addać usio, što zarobić na praciahu 20 hod. Ipatečny kredyt tut darahi i kvatera dla zvyčajnych siamiej zastajecca maraj, jakaja nikoli nie spoŭnicca. U Maskvie, jak piša Niamcoŭ, budavacca nievierahodna doraha. Łužkoŭ lubić akružać horad čarhovymi abjazdnymi – kalcavymi darohami. A jany šmat kaštujuć.
Košt kiłamietra MKAD siahaŭ 100 młn. dołaraŭ. Čarhovaje, treciaje kalco, padaražeła da 117 młn. Ale heta jašče było tanna. Kiłamietr zdadzienaha niadaŭna kavałka čaćviortaha kalca kaštavaŭ užo 537 młn. dołaraŭ.Toje, što paličyŭ Niamcoŭ, daražej za kiłamietr tunelu pad Ła-Manšam albo kiłamietr zvyšsučasnaha vialikaha adronnaha kałajdera, pabudavanaha na miažy Francyi i Šviejcaryi. Były vicepremjer davodzić, što siaredniaja cana kiłamietra darohi ŭ Maskvie vyšejšaja ŭ 10 razoŭ, čym u ZŠA ci Hiermanii. Na jaho pohlad, tak adbyvajecca tamu, što Maskva Łužkova źjaŭlajecca najbolš karumpavanym horadam u Rasii, jakaja, ŭ svaju čarhu, ličycca adnoj z najbolš karumpavanych krain śvietu.
Jak prykład padaje biznes žonki mera Łužkova Aleny Baturynaj. Kali jon staŭ meram, jana była ŭładalnicaj nievialikaj firmy, što zajmałasia vytvorčaściu płastykavych vyrabaŭ. Potym atrymała kantrol nad budaŭničym rynkam stalicy i, zarabiŭšy kala 1 młrd. dołaraŭ, stała samaj bahataj žančynaj u Rasii.Niamcoŭ u svaim raparcie naličvaje 23 vialikija budoŭli (kožnaja – heta sotni tysiač kvadratnych mietraŭ žylla, ofisaŭ albo hatelaŭ), jakimi Baturyna kiruje ci kiravała ŭ Maskvie. Jana, pavodle jaho, vyjhraje tendery na najlepšyja abjekty, lohka atrymoŭvaje vialikija kredyty na budoŭli. Kali, užo padčas kryzisa, što mocna ŭdaryŭ pa rynku nieruchomaści, Baturyna zajmieła vialikija prablemy, horad kinuŭ joj paratunak, kuplajučy u jaje praz pasiarednikaŭ za 13 młrd. rubloŭ (kala 400 młn. dołaraŭ) učastak u 58 ha. U kastryčniku ŭ Maskvie projduć vybary ŭ haradskuju dumu. Vybarčaja kampanija heta, jak mahło by padacca, dobry momant na toje, kab vyśvietlić – čamu ŭsio ŭ horadzie tak doraha, čamu takaja karupcyja. Ničoha takoha nie adbyvajecca. Haradskaja vybarčaja kamisija nie dapuściła da vybaraŭ anivodnaj partyj i nivodnaha kandydata, jakija sprabavali krytykavać mera. Prosta ahułam dyskvalifikavała ŭsie podpisy vybarcaŭ, padtrymlivajučych ich kandydatury, abviaščajučy ich falšyvymi. Pavodle kamisii, viercham nieakuratnaści vyznačyŭsia Uładzimir Miłaŭ, adzin ź lideraŭ «Salidarnaści», jaki sfalšavaŭ navat svoj ułasny podpis, katorym padtrymaŭ ułasnuju kandydaturu na deputackuju pasadu.
«Dyk dadomu zabiary ałkaša abascanaha i vychodžvaj». Małady zahadčyk adździaleńnia balnicy nie strymlivaje siabie ŭ vyrazach u sacsietkach21
Kamientary