Źviestki pra toje, što byłoha deputata Viarchoŭnaj Rady ad praŭradavaj frakcyi «Słuha naroda», jaki paśla pačatku rasijskaj akupacyi Chiersonščyny pierajšoŭ na bok voraha i zaniaŭ vysokuju pasadu ŭ akupacyjnaj administracyi, zastrelili, stali źjaŭlacca va ŭkrainskich i rasijskich telehram-kanałach jašče ŭčora ŭviečary. Ciapier heta aficyjna paćvierdziŭ rasijski Śledčy kamitet, piša «RIA Novosti»
Cieła kałabaranta z ahniastrelnym ranieńniem u hałavu znajšli ŭ jaho domie ŭ horadzie Hołaja Prystań na Chiersonščynie. Pobač lažała pompavaja strelba «Mośbierha», jakaja aficyjna była zarehistravanaja na samoha Alaksieja Kavalova. Chto stralaŭ — vyśviatlajuć.
Taksama nažom u šyju była paranienaja 38-hadovaja kachanka Kavalova, jana była špitalizavanaja, a paśla pamierła ŭ balnicy.
Pa papiarednich źviestkach, napad adbyŭsia ŭčora niedzie kala 15-j hadziny.
Kali pačałasia ahresija Rasii suprać Ukrainy, narodny deputat Kavaloŭ znachodziŭsia ŭ Kijevie, ale paśla atrymańnia viestki pra akupacyju Chiersonščyny nakiravaŭsia dachaty. Spačatku jon zapeŭnivaŭ, što nie supracoŭničaje z akupantami, a pracuje ŭ svajoj akruzie, kirujučysia ŭkrainskim zakanadaŭstvam, ale na pačatku červienia skinuŭ masku i adkryta zajaviŭ, što Rasija tut nazaŭsiody i jon źviazvaje ź joj ułasnuju budučyniu i budučyniu rehijona.
Paśla taho Kavaloŭ byŭ pryznačany akupantami na pasadu namieśnika staršyni prarasijskaha ŭrada Chiersonskaj vobłaści pa pytańniach sielskaj haspadarki. Da deputactva jon byŭ tut paśpiachovym fiermieram.
Kamientary