U Łuninienckim rajonnym sudzie 7 kastryčnika vyniesieny prysud 60-hadovamu Siarhieju Hlivienku, abvinavačanamu ŭ abrazie zahinułych u Baranavičach lotčykaŭ (art. 369 Kryminalnaha kodeksa). Termin pa prysudzie akazaŭsia mienšy, čym mužčyna adsiadzieŭ da suda — biez matracaŭ, paśla apieracyi. Kampiensacyja za «pierasiedžany» čas nie praduhledžanaja, piša «Viasna».
Spravu razhladała sudździa Śviatłana Bratanava, dziaržaŭnaja abvinavaŭca — pamočnica prakurora Hanna Pienier.
Sudovy praces pačaŭsia z vyśviatleńnia asoby, padčas jakoha na pytańnie sudździ «hramadzianinam jakoj krainy źjaŭlajeciesia?» abvinavačany adkazaŭ: «Pakul jašče Biełarusi».
Hlivienka byŭ zatrymany ranicaj 4 traŭnia 2022 hoda ŭ Łunincy i źmieščany pad vartu.
Pierad pačatkam suda jon zajaviŭ, što nijakich pakazańniaŭ davać nie budzie.
«Ja znachodziŭsia pa-za miežami Biełarusi, u Maskvie, i tamu biełaruskaje zakanadaŭstva nie parušaŭ. Svajoj viny nie pryznaju. Maja vina ničym nie dakazanaja, pakolki pad fotazdymkam zahinułych u Baranavičach lotčykaŭ, było napisana «Carstva im Niabiesnaje!», zajaviŭ jon sudu.
Taksama admoviŭsia ad pasłuh advakata.
Nahadajem, što zhodna z materyjałami spravy, Siarhiej Hlivienka, znachodziačysia nibyta ŭ niećviarozym stanie ŭ pieryjad času z 21 traŭnia pa 16 červienia 2021 hoda, z terytoryi Rasijskaj Fiederacyi, dzie jon na toj čas znachodziŭsia, u sacyjalnaj sietcy Facebook u hrupie «ATN: Naviny Biełarusi i śvietu» pad videazapisam siužetu «U Biełarusi raźvitalisia ź lotčykami-hierojami Andrejem Ničyporčykam i Mikitam Kukanienkam. Panarama» raźmiaściŭ paviedamleńni cyničnaha charaktaru. Ci heta i jość paviedamleńnie «Carstva im Niabiesnaje!», nie ŭdakładniajecca.
Dalej u sudzie Hlivienka zajaviŭ chadajnictva ab tym, kab jamu vydali ŭ izalatar matrac, pakolki jon niadaŭna pieranios niekalki apieracyj i jamu nielha spać na hołych doškach. Chadajnictva sudom nie było zadavolenaje.
Sud pryznaŭ Siarhieja Hlivienku vinavatym i vynies nastupnaje pakarańnie: aryšt terminam na 3 miesiacy.
Jaho vyzvalili z-pad varty ŭ zale suda. A voś kampiensacyja za dva «lišnija» miesiacy pad śledstvam u takim vypadku zakanadaŭstvam nie praduhledžanaja.
Kamientary