Kliševič i Baskaŭ źjeździli razam z rasijskimi deputatami ŭ niepryznanuju Biełaruśsiu Abchaziju
Vizit sumiesnaj delehacyi rasijskich i biełaruskich deputataŭ u niepryznanuju Biełaruśsiu Abchaziju byŭ aformleny ad imia tak zvanaha Parłamienckaha schodu Sajuznaj dziaržavy. Delehacyja była pryniataja na najvyšejšym dla niepryznanaj respubliki ŭzroŭni, ź joj sustreŭsia sam kiraŭnik Abchazii Asłan Bžanija, paviedamlaje Apsny-pres. A siarod biełaruskich udzielnikaŭ byli takija adyjoznyja asoby, jak deputat PP NS Siarhiej Kliševič i «sienatar» Dźmitryj Baskaŭ.
Asłan Bžanija jaŭna chacieŭ zrabić biełaruskim haściam pryjemnaje i raskazaŭ im historyju ź dziacinstva, u realnaści jakoj, viadoma, možna sumniavacca:
«U maim rodnym siale byŭ pijanierski łahier, dzie adpačyvali dzieci ź Biełarusi. Mianie ŭ maleńkim uzroście adpravili ŭ hety łahier, kab ja vyvučyŭ ruskuju movu. U vyniku, kali ja viarnuŭsia, vyśvietliłasia, što ja vyvučyŭ nie ruskuju, a biełaruskuju movu», — adznačaje Asłan Bžanija.
U lubym vypadku, uličvajučy staŭleńnie da biełaruskaj movy z boku łukašenkaŭskaha režymu, kamplimient davoli dvuchsensoŭny, i naŭrad ci Kliševič z Baskavym jaho acanili.
Čamu ŭvohule pryjazdžali ŭ Abchaziju biełaruskija hości — u infarmacyjnaj natatcy nie ŭdakładniajecca. Ale padobna na toje, što heta praciah trendu, zadadzienaha niečakanym vizitam u abchazskuju Picundu 28 vieraśnia samoha Łukašenki paśla pieramovaŭ z Pucinym u Sočy.
Pry hetym ni biełaruskaja BiełTA, ni rasijskija dziaržaŭnyja infarmacyjnyja ahienctvy TASS i «RIA Novosti» pra hetuju pajezdku čamuści nie paviedamlali.
Čytajcie taksama:
«My pavinny ŭmacoŭvać adnosiny ź siabrami». Łukašenka nasamreč u samaabvieščanaj respublicy Abchazija
Ciapier čytajuć
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»88
Kamientary