Siońnia pačynajecca sudovy praces nad aktyvistami niezaležnych prafsajuzaŭ
U Minskim haradskim sudzie 25 listapada pačynajecca sudovy praces nad aktyvistami biełaruskich niezaležnych prafsajuzaŭ — palitviaźniami Hienadziem Fiadyničam, Vasilom Bieraśnievym i Vacłavam Areškam, paviedamlaje «Viasna».
Ich abvinavačvajuć ŭ zaklikach da mier abmiežavalnaha charaktaru, nakiravanych na pryčynieńnie škody nacyjanalnaj biaśpiecy Respubliki Biełaruś (č. 3 art. 361 Kryminalnaha kodeksa), raspalvańni inšaj sacyjalnaj varožaści (č. 3 art 130), stvareńni ekstremisckaha farmiravańnia albo ŭdziele ŭ im (č.1 i č. 3 art. 361-1 Kryminalnaha kodeksa).
Spravu pryznačanaja razhladać sudździa Anastasija Papko.
Hienadź Fiadynič — były kiraŭnik niezaležnaha prafsajuza rabotnikaŭ radyjoelektronnaj pramysłovaści — REP. U 2018 hodzie za aktyŭnuju prafsajuznuju dziejnaść byŭ asudžany da 4 hadoŭ abmiežavańnia voli biez nakiravańnia — «chatniaja chimija». 11 krasavika 2022 h. KDB pryznaŭ Niezaležny prafsajuz rabotnikaŭ radyjoelektronnaj pramysłovaści (REP) «ekstremisckim farmiravańniem».
Hienadzia zatrymali 19 krasavika 2022 hoda i źmiaścili ŭ SIZA KDB. Paźniej jaho pieraviali ŭ SIZA-1.
Vasil Bieraśnieŭ — lidar aršanskaha niezaležnaha prafsajuza REP, vykanaŭca abaviazkaŭ staršyni prafsajuza REP. Jon byŭ zatrymany 19 krasavika 2022 hoda ŭ miežach kryminalnaj spravy. Mužčynu źmiaścili ŭ SIZA i vystavili abvinavačvańni.
U Vasila značna pahoršyłasia zdaroŭje ŭ SIZA, jon pakutuje ad bolaŭ u adzinaj nyrcy.
Viačasłaŭ Areška — biełaruski palitołah i hramadski dziejač, aktyvist prafsajuza REP, viadomy jak Vacłaŭ Areška. Zatrymany 19 krasavika 2022 hoda paśla pieratrusu ŭ kvatery. Viačasłava źmiaścili ŭ SIZA KDB, jamu vystavili abvinavačvańnie. U lipieni jaho pieraviali ŭ SIZA-1 na Vaładarskaha.
Kamientary