Miasa, arechi, špinat: racyjon «žaleznaha» zdaroŭja

Hety važny mikraelemient uvachodzić u skład hiemahłabinu, ź jakoha składajucca kletki kryvi — erytracyty. Mienavita jany dastaŭlajuć kisłarod dakładna pa pryznačeńni — da orhanaŭ i tkanak. Žaleza taksama adyhryvaje važnuju rolu ŭ chalesterynavym abmienie, padtrymańni imunitetu, piša «Źviazda».

Naš arhanizm hety kaštoŭny mikraelemient samastojna nie vypracoŭvaje. Tamu važna, kab u racyjonie jon byŭ u dastatkovaj kolkaści. Asabliva majuć patrebu ŭ žalezie žančyny dzietarodnaha ŭzrostu, pakolki rehularna hublajuć heta rečyva padčas «krytyčnych» dzion. Pa acenkach śpiecyjalistaŭ, mužčynam dastatkova atrymlivać ź ježaj 10 mh žaleza štodnia, žančynam treba 15-18 mh, a padčas ciažarnaści 20 mh.

U jakich praduktach jość?

Žalezam bahata čyrvonaje miasa, pryčym źmiaščajecca mikraelemient tam u hiemavaj formie i lohka zasvojvajecca. Katlety ź jałavičyny ci śvininy, viandlina i kaŭbasy, miasa trusa i baranina papoŭniać zapasy žaleza ŭ arhaniźmie. Bahatyja žalezam serca, nyrki žyvioł, asabliva šmat jaho ŭ piečani. Kaštoŭnaja krynica žaleza — vustrycy i inšyja maluski, jakija da taho ž nizkakałaryjnyja i nie ŭtrymoŭvajuć chalesterynu, a taksama arechi. 

Jość lidary pa ŭtrymańni mikraelemienta i siarod harodniny — heta špinat, brokali, a siarod sadaviny — jabłyki, hranat, razynki. Dastatkova žaleza ŭ žytnim chlebie, hrečcy. Ciomny šakaład taksama moža dapamahčy nasycić arhanizm žalezam. I, viadoma, hiematahien — sałodkija plitki z albuminam, jakija možna nabyć u aptekach.

Jak vyjaŭlajecca deficyt?

Pastajannaje pačućcio stomlenaści, hałavakružeńnie, adsutnaść apietytu, suchaść i bledny koler skury, vypadzieńnie vałasoŭ, łomkaść paznohciaŭ i niezahojnyja treščynki ŭ kutkach vusnaŭ mohuć sihnalizavać pra deficyt žaleza. A jašče ludzi, jakija pakutujuć ad niedachopu žaleza, schilnyja da častych prastud i inšych infiekcyj.

Čym vyklikany nizki ŭzrovień žaleza ŭ arhaniźmie? Čaściej za ŭsio — niedachopam u racyjonie praduktaŭ, jakija hety mikraelemient utrymlivajuć. Pryčynaj u žančyn mohuć być mocnyja mienstruacyi, strata kryvi ŭ vyniku apieracyjnych umiašańniaŭ, traŭmaŭ i h.d. Časam žaleza ŭ ježy dastatkova, ale jaho ŭsmoktvańnie parušana. Heta zdarajecca z-za niekatorych zachvorvańniaŭ straŭnika i kišečnika.

Čym dapamahčy?

Kali ŭ vas niama surjoznych zachvorvańniaŭ ŽKT, a deficyt žaleza vyklikany tolki niezbałansavanym charčavańniem, dastatkova źmianić jaho charaktar, kab palepšyć situacyju. Dapamahčy mohuć vitaminna-minieralnyja kompleksy. Kab žaleza zasvojvałasia, u vašym racyjonie abaviazkova pavinny prysutničać vitaminy A, S, Je, a taksama hrupy V, asabliva V12. Pierš čym prymać dabaŭki z žalezam, nieabchodna paraicca z doktaram.

• 31
• 0
• 0
• 0
• 1
• 0
• 2
• 0