Minfin ZŠA: Rasijskija aliharchi viedali pra datu ŭvarvańnia i kinulisia pierapisvać svaje aktyvy na svajakoŭ
Ahienctva baraćby ź finansavymi złačynstvami pry Ministerstvie finansaŭ ZŠA FinCen apublikavała pramiežkavuju spravazdaču ab vynikach rasśledavańnia dziejańniaŭ rasijskich aliharchaŭ napiaredadni ŭvarvańnia Rasii va Ukrainu.
Raniej stała viadoma, što jany, miarkujučy pa ŭsim, viedali zahadzia pra datu rasijskaha ŭvarvańnia va Ukrainu i pieraviali svaje aktyvy na imia svaich dziaciej, kab vyvieści ich z-pad sankcyj.
U svajoj spravazdačy FinCen paćviardžaje hetuju infarmacyju, abapirajučysia na spravazdačy inšych struktur, u jakich apisany padazronyja apieracyi ź miljardami dalaraŭ na rachunkach i ŭ fondach šerahu rasijan.
U pačatku studzienia brytanskaja Guardian, sa spasyłkaj na ŭciečki, jakija apynulisia ŭ rasparadžeńni redakcyi, padrabiazna napisała pra dziejańni Ramana Abramoviča.
Pavodle infarmacyi vydańnia, u samym pačatku lutaha, za try tydni da pačatku vajny, na dziesiaci afšornych rachunkach Abramoviča adbyłasia imklivaja rearhanizacyja.
Z uciečak vynikaje, što bienieficyjarami fondaŭ z sumarnymi aktyvami jak minimum u čatyry miljardy dalaraŭ stali siamiora dziaciej Abramoviča, małodšamu ź jakich dzieviać hadoŭ.
Aktyvy taksama ŭklučajuć nieruchomaść, jachty i pryvatnyja samaloty.
Pa časie hetaja aktyŭnaść taksama supała z papiaredžańniem z boku zachodnich krain pra nieminučyja sankcyi ŭ dačynieńni da blizkich da Pucina biznesmienaŭ u vypadku ŭvarvańnia va Ukrainu.
FinCen daje zrazumieć, što havorka idzie pra niekalkich rasijskich aliharchaŭ i pradstaŭnikoŭ elity, jakija źviarnulisia da takoj ža schiemy. Ale imiony inšych asob pakul nie nazyvajucca.
Ciapier čytajuć
Daškievič raskazaŭ, jak trapiŭ za kratami ŭ nizki status i napisaŭ prašeńnie ab pamiłavańni3
Kamientary