Deputaty Jeŭraparłamienta zaklikali UEFA adchilić zbornuju Biełarusi ad udziełu ŭ kvalifikacyjach da ČIE — 2026
104 deputaty Jeŭrapiejskaha parłamienta źviarnulisia ź listom da prezidenta UEFA Alaksandra Čefieryna z prośbaj adchilić zbornuju Biełarusi ad udziełu ŭ kvalifikacyjnych matčach da čempijanatu Jeŭropy 2024 hoda. Pra heta piša «Radyjo Svaboda» sa spasyłkaj na list, jaki trapiŭ u redakcyju.
Svoj zaklik jany matyvavali represijami ŭ Biełarusi i saŭdziełam biełaruskich uład u vajnie suprać Ukrainy.
«My ličym važnym, kab UEFA pierahledzieŭ svaju ciapierašniuju pazicyju ŭ dačynieńni da Biełaruskaj fiederacyi futboła. Ź mižnarodnaha punktu hledžańnia, vidavočna, što ciapierašnija zachady nieadekvatnyja i nie adlustroŭvajuć taho, što robiać biełaruskija ŭłady ŭ dačynieńni da pravoŭ čałavieka i inšych kaštoŭnaściaŭ UEFA.
Niavinna zatrymanyja ciarpiać katavańni i źniavahi, što, biezumoŭna, parušaje ich pravy i svabody. Značnaja častka biełaruskaha hramadstva ciapier žyvie ŭ strachu, jana zapałochana tym, što navat niaznačnyja prykmiety niepadtrymki režymu Łukašenki mohuć pryvieści da straty ich karjery abo voli. U tym liku i biełaruskija spartsmieny. Tamu dla nas jasna, što tyja futbalisty, jakija jašče zastajucca ŭ biełaruskaj futbolnaj zbornaj, padtrymlivajuć režym Łukašenki.
Jak usie hetyja fakty možna suadnieści z kaštoŭnaściami UEFA i matčami UEFA, jakija pavinny być simvałam miru i supracoŭnictva, jakija ŭvasobleny ŭ futbolnaj siamji? Sam fakt udziełu zbornaj Biełarusi ŭ čempijanacie UEFA paźniej budzie vykarystany Łukašenkam i jaho prapahandysckaj kamandaj, kab dakazać, što jaho dobra prymajuć u mižnarodnaj supolnaści», — havorycca ŭ liście.
Adboračny turnir da čempijanatu Jeŭropy pa futbole startuje ŭžo na nastupnym tydni.
Kamientary