U Łošyckim siadzibna-parkavym kompleksie ŭ Minsku płanujuć adnavić histaryčny młyn. Pra heta 6 sakavika na naradzie ŭ Minharvykankamie paviedamiŭ kiraŭnik pradpryjemstva «Minskaja spadčyna» Alaksandr Jacko, piša ahienctva «Minsk-Naviny».
Adnaŭleńnie młyna stanie adnym z apošnich etapaŭ rekanstrukcyi ŭsiaho kompleksu. Budynki, dzie raniej znachodzilisia młyn i kaplica, doŭhi čas byli ŭ zaniadbanym i razburanym stanie, tamu ich płanujuć adnavić z maksimalnym zachavańniem histaryčnaha vyhladu. Ciapier zaviaršajecca padrychtoŭka prajektna-kaštarysnaj dakumientacyi.
Młynu chočuć viarnuć nie tolki źniešni vyhlad, ale i jaho raniejšuju funkcyju. Unutry źbirajucca pastavić sapraŭdny młynavy miechanizm, jaki budzie małoć muku. Pavodle adnoj ź idej, turysty zmohuć pasprabavać stravy, pryhatavanyja z muki, źmielenaj na hetym młynie.
Budynak kaplicy atrymaje novaje pryznačeńnie: tam płanujuć adkryć šmatfunkcyjanalny turystyčny infarmacyjna-aśvietnicki centr, dzie naviedniki zmohuć daviedacca pra historyju Łošyckaha kompleksu.
Staršynia Minharvykankama Uładzimir Kucharaŭ padkreśliŭ, što prajekt treba realizavać vielmi staranna. Miechanizm młyna, jak jon ličyć, pavinien być dobra bačny dla naviednikaŭ, ale pry hetym pracavać całkam biaśpiečna.
U čym pryčyna niezadavolenaści žycharoŭ mikrarajona Lebiadziny ŭ Minsku? Voś što nasamreč tam płanavali budavać6
Kamientary