Pa TB raskazali padrabiaznaści taho, jak «Łamakin» kursiravaŭ pa Biełarusi i jak jaho nibyta brali kadebisty

Pavodle źviestak prapahandystaŭ, u Biełaruś «Łamakina» nibyta zakinuli z Polščy. Spačatku z 24 pa 28 lutaha jon žyŭ u Mahilovie, 1 sakavika nakiravaŭsia ŭ Minsk, a paśla pierabraŭsia ŭ Hrodna, źniaŭšy kvateru na vulicy Kurčatava.

«Inšaziemiec» hrymiravaŭsia, ale vielmi niaŭmieła, usio było vielmi nienaturalnaje, što zaŭvažali navat taksisty, «jakija, ŭ tym liku dastaŭlali jamu ałkahol». Nibyta jon nie tolki piŭ sam, ale i šukaŭ kampanii z vypadkovych ludziej.

A pamiž tym jon nibyta rychtavaŭ terakt: «15 sakavika kupiŭ biespravadny dźviarny zamok, dalokaściu dziejańnia 100 mietraŭ. Jašče adzin — elektryčny — uziaŭ z 5-mietrovym provadam u budaŭničym. Dla dystancyjnaha padryvu. Na mietałaprakacie kupiŭ kavałkami 12 mietraŭ armatury. Elemienty dla paražeńnia — raźlik na maksimalnuju kolkaść achviar. I klučavoje — vybuchoŭka, bojeprypasy, zbroja — čakali ŭ schovankach».

18 sakavika Alaksiej Łamakin nibyta nakiravaŭsia ŭ bok adnoj sa schovanak sa zbrojaj na 38-y kiłamietr trasy Hrodna — Astryna. Tam nibyta była schavanaja sumka z aŭtamatam Kałašnikava, patronami da jaho i bajavymi hranatami.

A dalej, kali jon byŭ užo sa zbrojaj na kvatery, 19 sakavika ŭ jaho dźviery pastukali kadebisty. ANT apisvaje chranałohiju taho, što nibyta adbyvałasia paźniej:

«Uvachod u kvateru teraryst zabarykadavaŭ, kab hrupa «A» nie zmahła chutka zajści — z raźliku, što bajcy buduć traplać u pryceł pa adnym. U dźviarnym prajomie ŭ pakoi sprava abstalavaŭ ahniavy punkt, schavaŭšysia za meblaj. Dva streły z aŭtamata mima. Dva — u ščyt. Kamiera źlataje na padłohu. Bajcy adychodziać na biaśpiečnuju adlehłaść. Da ŭzbrojenaha supracivu byli hatovyja. Bajcy zazirajuć u kvateru z dapamohaj teleskapičnaj kamiery. Za meblaj u prachodzie ničoha nie vidać. Teraryst chavaŭsia i rychtavaŭsia sustrakać ahniom. Druhi zachod. Dva adzinočnych, čarha i ručnaja hranata naŭzdahon. Bajcy vokamhnienna reahujuć i chavajucca za ščyt. Ahłušalny vybuch. Usie cełyja. Adychod. Z advarotnaha boku doma bajcy strachavali vokny, dyk voś hetyja samyja vokny vyniesła vybucham. Ahoń u adkaz. Papadańnie. Teraryst paranieny. Akazańnie pieršaj dapamohi. Evakuacyja. Złačynca pasprabavali vyratavać. Chutka vynosiać z doma i hruziać u mašynu. Ale na šlachu ŭ balnicu strałok pamior. Ni bajcy «Alfa», ni cyvilnyja nie paciarpieli».

Žyllo ŭ Homieli nibyta było źniataje na termin z 21 da 23 sakavika, a paśla «Łamakin» płanavaŭ biehčy va Ukrainu.

Pa fakcie padrychtoŭki da ździajśnieńnia aktu teraryzmu KDB raspačaŭ kryminalnuju spravu, śledčyja ŭžo dapytali 14 čałaviek, piaciarych źmiaścili ŭ śledčy izalatar. Siarod aryštavanych ułaśnica kvatery, piensijanierka Alena Kaścievič, a taksama jaje syn Alaksandr, jaki zajmaŭsia pytańniami arendy.

«Padčas nieadkładnych śledčych dziejańniaŭ u kvatery, arandavanaj Łamakinym, vyjaŭlenyja i kanfiskavanyja aŭtamat AK-74, 2 padrychtavanyja mahaziny da jaho, hranata F1, 26 kavałkaŭ armatury, radyjokiravany dźviarny zvanok, pašpart zamiežnaha hramadzianina z prykmietaj padrobki i paryk», — raskazvaŭ raniej aficyjny pradstaŭnik KDB Kanstancin Byčak.

Abjadnańnie «Bajpoł» nazvała toje, što adbyłosia ŭ Hrodnie, insceniroŭkaj, pry jakoj rolu «Łamakina» vykonvaŭ supracoŭnik viciebskaha KDB Alaksiej Zacharaŭ.

• 3
• 0
• 37
• 7
• 5
• 5
• 4
• 0