Hod dziorzkaj nadziei Abamy

4 listapada 2008 hoda nazaŭsiody ŭvojdzie ŭ historyju Złučanych Štataŭ Amieryki. U hety dzień prezidentam krainy, a adnačasova i adnym z samych upłyvovych ludziej u śviecie, byŭ abrany Barak Chusejn Abama II. Aficyjna ŭstupiŭ na pasadu 20 studzienia 2009 h. paśla inaŭhuracyi.

Na prezidenckich vybarach hety, viasiołaha i maładoha vyhladu čałaviek (nar. u 1961 h.), atrymaŭ pierakanaŭčuju pieramohu. Šmat chto ŭviazvaŭ toje ź niepapularnaściu administracyi respublikancaŭ, adnak padajecca, što abajalnaść ciomnaskuraha kandydata mahła b skaryć vybarščykaŭ i biez durnoctvaŭ Buša‑małodšaha. Papularnaść Baraka Abamy ablacieła ŭvieś śviet. I pierad vybarami ŭ ZŠA mała chto sumniavaŭsia ŭ pieramozie demakrataŭ. Niahledziačy na toje, što štab Abamy ŭpieršyniu ŭ historyi krainy admoviŭsia ad dziaržaŭnaha finansavańnia. Achviaravańniaŭ było dastatkova i bieź jaho — amal treciuju ich častku składali drobnyja pieravody pa niekalki socień dalaraŭ.

Pieramoha Baraka Abamy vyklikała sapraŭdnuju ejfaryju. I nie tolki ŭ ZŠA. Asabliva papularnaść novaha amierykanskaha prezidenta prajaŭlałasia ŭ Kienii — radzimie jaho baćki — inšych afrykanskich krainach i na Blizkim Uschodzie. Takaja źjava navat vyklikała reakcyju ŭ palitołahaŭ, jakija nazvali jaje «abamamanijaj».

Nie dziva, što uvieś śviet ź cikavaściu hladzieŭ na Abamu. Jaho vyklučnaja papularnaść i palityčnaja nieardynarnaść prymušała spadziavacca na rašučyja kroki i pieramieny.

Pieršym surjoznym krokam Abamy na prezidenckaj pasadzie było padpisańnie pastanovy ab zakryćci na praciahu hoda turmy ŭ «Huantanama».

Turmy dla padazravanych u traryźmie na hetaj kubinskaj amierykanskaj bazie bolš niama, adnak byłyja viaźni praŭdy pakul tak i nie damahlisia. Tolki što ŭ ŚMI źjavilisia žachlivyja padrabiaznaści ab katavańniach dy nienaviśniki ZŠA čarhovy raz atrymali pryčynu dla krykaŭ.

Nastupnym krokam novaha prezidenta była raspracoŭka płana stymulavańnia amierykanskaj ekanomiki. U časy kryzisu, jaki tady ŭžo paśpieŭ achapić Złučanyja Štaty, heta było prosta nieabchodna. Abama vyznačyŭsia i tut, čarhovy raz ździviŭšy śviet. Pavodle płanu prezidenta, amierykanskaja ekanomika patrabavała ŭlivańnia 819 młrd. dalaraŭ. Sumy, niesłychannaj dahetul. Jašče bolšaje ździŭleńnie ŭ ZŠA i śviecie vyklikała rašeńnie Sienatu pryniać płan Abamy. Pry hetym padvysiŭšy jaho košt da 838 młrd. Złučanyja Štaty ŭzdychnuli spakojna. Zdavałasia, što ŭsio vielmi chutka vypravicca. Adnak vahańni amierykanskaj ekanomiki nie spyniajucca, prymušajučy chvalavacca ŭvieś astatni śviet. A zajavy ciomnaskuraha prezidenta ab datacyjach sacyjalnaj i miedycynskaj śfier bolš nahadvajuć zajavy papulista, čym realnyja mahčymaści amierykaskaj administracyi.

Nie mienš sprečnymi vyhladajuć i kroki Abamy ŭ zamiežnaj palitycy.

Spačatku značnaje i biezvynikovaje pavieličeńnie kolkaści amierykanskaha kantynhientu ŭ Aŭhanistanie, potym pierahlad płanaŭ stvareńnia sistemy supraćpavietranaj abarony ŭ centralnaj Jeŭropie. A na zaviaršeńnie dyk i zusim niečakany krok — vizit u Maskvu i ciopłyja pieramovy ź jaje kiraŭnictvam. Takaja aktyŭnaść dy niepradkazalnaść, jak na prezidenta ZŠA, pryniesła Baraku Abamie Nobieleŭskuju premiju miru. Pavodle kamiteta ŭ Stakholmie — «za zvyšardynarnyja vysiłki pa zamacavańniu mižnarodnaj dypłamatyi i adnosinaŭ pamiž ludźmi». Šmat chto tady trapna zaŭvažyŭ, što nobieleŭskaj premijaj upieršyniu ŭznaharodzili nie taho, chto niešta zrabiŭ, a taho, chto tolki vykazaŭ hatoŭnaść toje zrabić.

Chtości nazavie Abamu papulistam, katory ŭmieła vykarystaŭ čakańni amierykancaŭ. Inšy skaža, što jamu adnamu niemahčyma ŭvadnačaśsie źmianić amierykanskuju biurakratyčnuju machinu. Adnak fakt, što Barak Chusejn Abama II padaryŭ ludziam va ŭsim śviecie nadzieju. I hetaja dziorzkaja nadzieja jašče maje čas, kab realizavacca.

Aleś Pilecki

• 0
• 0
• 0
• 0
• 0
• 0
• 0
• 0