Pavodle ŭciečak amierykanskich sakretnych dakumientaŭ, Hałoŭnaje ŭpraŭleńnie raźviedki Ukrainy płanavała vajskovyja apieracyi suprać rasijskich sałdat u Siryi pry dapamozie kurdaŭ i pry ŭskosnaj zhodzie Turcyi. U toj ža čas rasijskija vajskoŭcy ledź nie źbili amierykanski bieśpiłotnik.
U 2022 hodzie Ukraina płanavała napad na rasijski kantynhient vojskaŭ u Siryi, adnak nie raspačała realizacyju svaich płanaŭ. Pra heta paviedamiła vydańnie The Washington Post sa spasyłkaj na čarhovuju porcyju źlitych sakretnych dakumientaŭ Pientahona.
U dakumientach skazana, što Hałoŭnaje ŭpraŭleńnie raźviedki (HUR) Ukrainy zajmałasia «ahresiŭnaj padrychtoŭkaj dyviersij, likvidacyj i destabilizujučych dziejańniaŭ» na kantralavanych Rasijaj terytoryjach Siryi z prymianieńniem bieśpiłotnikaŭ i naziemnych apieracyj, vykarystoŭvajučy kurdaŭ i siryjskija apazicyjnyja ŭzbrojenyja farmiravańni.
Metaj dadzienych mierapryjemstvaŭ było naniasieńnie adčuvalnaj škody ŭ rasijskim tyle i prymušeńnie Rasii da pieramiaščeńnia častki svaich vojskaŭ z Ukrainy ŭ Siryju (a nie naadvarot, jak heta adbyvałasia raniej).
«Ukrainskija aficery razhladali mahčymaść navučańnia čalcoŭ Siryjskich demakratyčnych sił (SDF) — vajskovych sił paŭnočna-ŭschodniaj aŭtanomii Siryi, jakaja kantralujecca kurdami — dla naniasieńnia ŭdaraŭ pa rasijskich abjektach i praviadzieńnia «niavyznačanych dziejańniaŭ» z dapamohaj BPŁA», — havorycca ŭ dakumientach.
Va ŭciečkach taksama skazana, što Siryjskija demakratyčnyja siły patrabavali ad Ukrainy harantyj zachavańnia ich udziełu ŭ padobnych apieracyjach u poŭnym sakrecie, adnak ab płanach daviedałasia Turcyja, jakaja źjaŭlajecca nieprymirymym supiernikam kurdskich farmiravańniaŭ.
Ale Turcyja nie stała pieraškadžać płanam Ukrainy i rekamiendavała toj ździajśniać svaje napady z terytoryj i pry dapamozie tych sił, jakija nijak nie złučany z Turcyjaj, kab nie vyklikać na siabie «zvarotny hnieŭ Maskvy». Turcyja chacieła, kab Rasija potym naniesła ŭdar u adkaz mienavita pa kurdach, što taksama adpaviadaje tureckim metam.
«U kančatkovym vyniku, pavodle dakumientaŭ, prezident Ukrainy Uładzimir Zialenski ŭ kancy śniežnia 2022 hoda zahadaŭ admianić realizacyju padobnych płanaŭ napadu. Heta mahło być vyklikana jak unutranymi prablemami na stadyi padrychtoŭki, tak i ŭmiašańniem ZŠA, jakija nie chacieli ŭskładniać ułasnyja apieracyi ŭ rehijonie», — piša The Washington Post.
Akramia hetaha, u dakumientach taksama raskazvajecca ab raniej nieviadomym incydencie, kali vosieńniu minułaha hoda rasijskija SPA ŭ Siryi abstralali i ledź nie źbili amierykanski bieśpiłotnik MQ-9 (adzin ź bieśpiłotnikaŭ hetaj ža madeli byŭ raniej źbity Rasijaj u akvatoryi Čornaha mora niepadalok ad Kryma).
Što za apieracyi Ukraina płanavała ŭ Siryi?
Zhodna z uciečkami, Ukraina źbirałasia atakavać rasijski marski port u Tartusie, aeraport Basiel al-Asad u Łatakii, a taksama rasijskuju vajennuju avijabazu Chmiejmim — hałoŭny aporny punkt Rasii ŭ Siryi.
Akramia hetaha ŭkrainskaja vajskovaja vyviedka płanavała napaści na kantralavanyja Rasijaj naftahazavyja radoviščy ŭ centralnaj Siryi, kab pazbavić Maskvu dadatkovych dachodaŭ dla finansavańnia vajny suprać Ukrainy.
U śpisie patencyjnych metaŭ dla napadu taksama byli najmity z PVK «Vahnier» i źviazany ź imi siryjski hazavy zavod «Džychar» kala horada Palmira.
«Usie hetyja apieracyi apisvajucca ŭ sakretnych dakumientach z pazicyi ŭzroŭniu ich patencyjnaj škody dla Rasii i vierahodnaści bolš ahresiŭnaha zvarotnaha ŭdaru ź jaje boku», — adznačaje The Washington Post.
Ukrainskaje kiraŭnictva pakul nijak nie prakamientavała infarmacyju z amierykanskich uciečak, a kiraŭnik HUR Ukrainy hienierał-major Kiryła Budanaŭ ad kamientaroŭ uvohule admoviŭsia.
Ciapier čytajuć
18‑hadovy były palitviazień raskazaŭ, što jon svajak Cichanoŭskaj. Jaho zatrymali, kali jon jechaŭ vajavać za Ukrainu2
Kamientary
No potom otmienili opieraciju.
Po riadu pričin.