Ekanamičny sud z padačy Ministerstva infarmacyi likvidavaŭ vydaviectva Źmitra Kołasa

Jak vynikała z anonsa pracesu, u svaim isk Ministerstva infarmacyi nastojvała na «pryznańni niesapraŭdnaj dziaržaŭnaj rehistracyi subjekta haspadarańnia» ŭ asobie indyvidualnaha pradprymalnika Źmitra Kołasa.

Pry hetym u matyvirovačnaj častcy adsutničali ŭciamnyja tłumačeńni taho, na čym hruntujecca niezadavolenaść vydaŭcom-pryvatnikam z boku dziaržavy.

Bo, navat zychodziačy z abjektyŭnych realij, vidavočna: dziakujučy Źmitru Kołasu, knižny rynak Biełarusi ŭžo bolš za try dziasiatki hadoŭ napaŭniajecca najlepšymi ŭzorami suśvietnaj litaratury, pierakładzienaj na biełaruskuju movu.

Hetyja dy inšyja arhumienty adkaźnik vykłaŭ padčas sprečak, choć i pryznajecca: ad pačatku nie nadta spadziavaŭsia, što jany buduć pryniatyja pad uvahu. Tym nie mienš ličyŭ siabie abaviazanym ich ahučyć. 

Adnak pryznačany na praces sudździa Alaksiej Rusiecki nie staŭ piarečyć Mininfarmu i isk zadavoliŭ.

Takim čynam, paśla amal 35 hadoŭ u vydavieckaj śfiery Źmicier Kołas vymušany zharnuć dziejnaść.

Praŭda, jość jašče čas, kab padać apielacyju i tym samym adterminavać ustupleńnie prysudu ŭ siłu — zastalisia ŭziatyja raniej abaviazki na vypusk šerahu knih.

U pracesie sudovaha razboru vyśvietliłasia, što farmalnaj padstavaj dla isku staŭ zbornik histaryčnych dakumientaŭ «Vyzvalenyja» i zaniavolenyja. Polska-biełaruskaje pamiežža 1939—1941 hh. u dakumientach biełaruskich archivaŭ».

U vychodnych danych vydaŭcom paznačany Źmicier Kołas, na jakoha zadnim čysłom «paviesili» parušeńnie zabarony na raspaŭsiudžvańnie.

Sioleta 6 studzienia sud Centralnaha rajona Minska pryznaŭ apublikavanyja dakumienty «ekstremisckimi materyjałami» — niahledziačy na toje, što praktyčna ŭsie jany pachodziać z fondaŭ Nacyjanalnaha archiva Biełarusi i Dziaržaŭnaha archiva hramadskich arhanizacyj Hrodzienskaj vobłaści.

Paradoks jašče i ŭ tym, što mienavita Ministerstva infarmacyi farmuje «ekstremisckija» śpisy i, jak ciapier stanovicca zrazumiełym, na padstavie atrymanych źviestak sa svajoj ža «bazy danych» inicyjuje sudovyja słuchańni dziela niejtralizacyi «ekstremistaŭ». 

Heta ŭžo nie pieršaje vyprabavańnie dla Źmitra Kołasa za apošni čas.

Na pačatku sakavika jaho zatrymali razam z drukarom Aleham Syčovym i nastupnyja 10 dzion pratrymali ŭ SIZA Kamiteta dziaržaŭnaj biaśpieki. U vyniku vydaŭca vyzvalili biez pradjaŭleńnia abvinavačańniaŭ, drukara pakinuli za kratami.

Pavialičyć

Praktyčna adrazu Źmicier Kołas paŭdzielničaŭ u Minskim mižnarodnym knižnym kirmašy, źbirajučy vakoł svajho stenda šmatlikich prychilnikaŭ pierakładnoj, śpiecyjalnaj, dziciačaj litaratury. Nijakich pretenzij na jaho adras u arhanizataraŭ nie było, ale nieŭzabavie vydaviec apynuŭsia ŭ sudzie. 

Źmicier Kołas pachodzić ź viadomaj siamji staličnaj intelihiencyi. Baćka Hieorhij Daniłavič — litaratar i teatralny krytyk, starejšy brat Uładzimir — piedahoh, režysior-kinadakumientalist.

Paśla zakančeńnia pierakładčyckaha fakulteta Instytuta zamiežnych moŭ pracavaŭ pavodle kantraktu ŭ Ałžyry i Siryi, pa viartańni vioŭ śpiecyjalny kurs u svajoj alma-matar. 

Ad kanca 1980-ch zasiarodziŭsia na vydavieckaj spravie — ahułam u hetym biźniesie blizu 35 hadoŭ. Pieršy praktyčny dośvied atrymaŭ u struktury Biełaruskaha humanitarnaha adukacyjna-kulturnaha centra, kali jašče nie isnavała abaviazkovaha licenzavańnia, a było dastatkova piśmovaha dazvołu ministra kultury i druku.

Na pačatku nulavych zarehistravaŭsia jak indyvidualny pradprymalnik i staŭ niezaležnym vydaŭcom. U 2014-m jašče raz pamianiaŭ status, kali Ministerstva infarmacyi zamianiła licenzavańnie na dziaržaŭnuju rehistracyju z vydačaj adpaviednaha paśviedčańnia.

Pryvatnaje vydaviectva Źmitra Kołasa viadomaje knihami suśvietnaj paezii, prozy, dramaturhii, dziciačaj litaratury ŭ najlepšych biełaruskich pierakładach. Šyrokaje pryznańnie čytackaj aŭdytoryi atrymała tematyčnaja sieryja «Paety płaniety» — pry kancy lutaha ŭ Minskaj abłasnoj biblijatecy imia Puškina adbyłasia impreza z nahody jubilejnaha, 100-ha vypusku.

• 1
• 0
• 0
• 0
• 0
• 2
• 8
• 0