Pieršaje paśla vahnieraŭskaha miaciažu źjaŭleńnie Šajhu na publicy akazałasia «kansiervaj». I voś pra što heta moža śviedčyć
Ministr abarony Siarhiej Šajhu ŭpieršyniu siońnia źjaviŭsia na publicy z momantu vajskovaha buntu PVK «Vahnier». Ale, pa źviestkach prarasijskich vajenkaraŭ, videa ź im zapisali jašče ŭ piatnicu. Publikacyja takoha videa ŭ paniadziełak moža śviedčyć pra toje, što Šajhu zachavaje svaju pasadu, jak piša «Ahientstvo».
Telekanał «Źviazda» apublikavaŭ videa pajezdki Šajhu ŭ punkt kiravańnia Zachodniaj hrupoŭkaj vojskaŭ u zonie bajavych dziejańniaŭ. Na kadrach pakazany palot i pasiadžeńnie, ale huk videa adklučany.
Blizki da Minabarony RF telehram-kanał «Rybaŕ» vykazaŭ zdahadku, što videa — «kansierva» (tak nazyvajuć zahadzia zapisanyja videa, jakija paźniej ułady vydajuć za źniatyja ŭ paźniejšyja daty). «Rybaŕ» miarkuje, što videa źniali jašče da pačatku buntu Pryhožyna. U svaich vysnovach kanał pryvodzić infarmacyju vajskovaha błohiera Barysa Rožyna. U piatnicu toj paviedamlaŭ pra vizit Šajhu ŭ Biełharodskuju vobłaść.
Były ambasadar ZŠA ŭ Rasii Majkł Makfoł adhuknuŭsia na hetu padzieju. Jon napisaŭ u tvitary, što źjaŭleńnie videa z Šajhu — heta «sihnał, što jaho nie źnimuć». «Prynamsi, ciapier», — udakładniŭ jon u inšym dopisie.
«Prysutnaść na kadrach razam z Šajhu Jaŭhiena Nikifarava i Michaiła Zuśko śviedčyć, što jany zachavali pasady kamandujučaha i načalnika štaba Zachodniaj vajennaj akruhi», — napisaŭ taksama vajenny analityk Rob Li.
Šajhu i Hierasimava, jakich Pryhožyn abvinavaciŭ u pravałach rasijskaha vojska, nie bačyli z momantu pačatku buntu. Heta navat sparadziła čutki siarod vajenkaraŭ pra toje, što Šajhu prybiaruć z pasady ministra, a jaho miesca zojmie hubiernatar Tulskaj vobłaści Alaksiej Dziumin.
Usiaho raz źjaŭlaŭsia padčas buntu i sam Uładzimir Pucin. Jon zapisaŭ zvarot na kamieru ź nieviadomaha miesca. Naradaŭ ź jaho ŭdziełam pakazana nie było. Analiz videa palotaŭ prezidenckich bartoŭ u vychadnyja moža śviedčyć pra toje, što prezident RF u subotu adjazdžaŭ u svaju rezidencyju na Vałdai.
Ź viečara suboty niama paviedamleńniaŭ u telehram-kanale pres-słužby Pryhožyna. Sproby žurnalistaŭ źviazacca z Pryhožynym skončylisia niaŭdačaj.
Jak stała viadoma «Kommiersantu», na ranicu 26 červienia kryminalnaja sprava ab arhanizacyi ŭzbrojenaha buntu (art. 279 KK RF), hałoŭnym fihurantam jakoj staŭ zasnavalnik PVK «Vahnier» Jaŭhien Pryhožyn, nie spynienaja.
-
Rasijskija ŭłady ŭ 2024 hodzie zapatrabavali ad Google vydalić rekordnuju kolkaść kantentu
-
U Łatvii admovilisia prybrać biełaruskija i rasijskija harady z darožnych pakazalnikaŭ
-
Dziaržaŭny sakratar ZŠA Marka Rubia budzie časova vykonvać abaviazki pamočnika prezidenta ZŠA ŭ nacbiaśpiecy zamiest Uołca
Kamientary