Zatrymanaja vykładčyca BDEU — unikalnaja znaŭca biełaruskaj movy i «Tryščanijany». A jaje maci ciapier u reanimacyi
Vykładčycu biełaruskaj movy, kandydatku fiłałahičnych navuk i dacentku kafiedry biełaruskaj i ruskaj moŭ Biełaruskaha dziaržaŭnaha ekanamičnaha ŭniviersiteta Nadzieju Staravojtavu zatrymali na minułym tydni.
U videa, vykładzienym siłavikami, pakazvajucca kadry z vykładčycaj na mirnych pratestach 2020 hoda. Na zapisie, zroblenym siłavikami, Nadzieja Staravojtava havoryć, što brała ŭdzieł u mitynhach, padčas jakich vychodziła na prajeznuju častku i nibyta rehistravałasia ŭ płanie «Pieramoha». Časta takija pryznańni ci samaabhavory ŭ ludziej vybivajuć katavańniami abo šantažom.
U tym roliku pakazali taksama zatrymanuju byłuju vykładčycu ruskaj movy ŭ Biełaruskim dziaržaŭnym univiersitecie fizkultury Natallu Sivickuju.
U kvatery Nadziei zastavaŭsia začynienym sabaka, pišuć u sacyjalnych sietkach siabry vykładčycy. Ulubiony łabrador vykładčycy chvareje na cukroŭku, jamu patrebny admysłovy dohlad. Ciapier za ŭlubioncam Nadziei budzie hladzieć brat.
Nakolki viadoma, vykładčycu adpravili na sutki.
Nadzieja Staravojtava — vybitny fiłołah, adnaja z najlepšych znaŭcaŭ biełaruskaj movy ŭ krainie.
U BDEU Nadzieja Staravojtava była zaŭsiodnaj papularyzatarkaj rodnaj movy, udzielničała ŭ litaraturnych konkursach dla vykładčykaŭ i studentaŭ. Nadzieja — aŭtarka karotkaha ramana «Arfahrafija biez praviłaŭ» (2008 hoda) i šerahu ese, apaviadańniaŭ i vieršaŭ.
Pracavała jana jak ź biełaruskimi, tak i z zamiežnymi studentami, u pryvatnaści, z kitajskimi, jakim vykładała biełaruskuju movu.
Uvohule biełarusistyčnaja hłotadydaktyka — mietodyka i praktyka vykładańnia biełaruskaj movy jak zamiežnaj — była adnoj z navukovych zacikaŭlenaściaŭ Staravojtavaj. Svaim dośviedam u hetym kirunku jana dzialiłasia ŭ navukovych artykułach (ich bolš za 80).
Biełarusistyčnaj hłotadydaktykaj Nadzieja Staravojtava zachapiłasia apošnija 7-8 hadoŭ, adznačajuć jaje znajomyja. A pieršym pradmietam daśledavańnia i zachapleńnia dla jaje była biełaruskaja «Tryščanijana» — vyvučeńnie pierakładaŭ na biełaruskuju movu suśvietna viadomaj siaredniaviečnaj lehiendy pra kachańnie Tryščana dy Ižoty (Trystana dy Izoldy ŭ rasiejskaj tradycyi).
Nadzieja Staravojtava žyła razam z maci. Apošnim časam Staravojtava ŭ sacsietkach pisała pieravažna pra krytyčny stan maci. Taja trapiła ŭ reanimacyju niezadoŭha da zatrymańnia dački.
«Naša Niva» — bastyjon biełaruščyny
PADTRYMAĆ-
U Baranavičach vylepili sa śniehu vialikaha kania ŭ palito FOTAFAKT
-
Pamiatajecie biełarusku, jakaja žyła i viała biznes u Litvie, ale nienavidzieła krainu? Daviedalisia, što z fanatkaj Łukašenki ciapier
-
«Pakul nie źniali tyktok — nichto nie varušyŭsia». Jak biełarusy vyrašajuć kamunalnyja prablemy praz ahałosku
Raźviedka ZŠA: Biełaruś stała pieradavym vajskovym płacdarmam Rasii24
Kamientary