Łatvija prapanuje zakryć adzin z dvuch punktaŭ propusku na biełaruskaj miažy
Jak zajaviŭ načalnik Pamiežnaj słužby Łatvii, abstanoŭka na hranicy siońnia samaja napružanaja za try hady.
Tak jak fiksujecca ŭsio bolš sprob nielehalnaha pierasiačeńnia miažy Łatvii z boku Biełarusi, kab vyzvalić bolš čałaviečych resursaŭ dla achovy miažy, načalnik Dziaržaŭnaj pamiežnaj achovy Łatvii Huncis Pujats prapanavaŭ zakryć adzin z dvuch pamiežnych kantrolna-prapusknych punktaŭ — «Silene» (ź biełaruskaha boku «Urbany»), paviedamlaje lsm.lv.
Pujats u efiry Łatvijskaha radyjo raspavioŭ, što situacyja na minułym tydni vydałasia, «napeŭna, samaj napružanaj za ŭsie try hady pačynajučy z 2021-ha». Pavodle jaho słoŭ, za tydzień praduchilena niezakonnaje praniknieńnie ŭ Łatviju 892 čałaviek. I nielha vyklučać taho, što asobnym parušalnikam mahło pašancavać, i ich nie złavili — choć na achovu miažy i kinutyja vialikija kadravyja resursy samoj pamiežnaj achovy, Nacyjanalnych uzbrojenych sił i Dziaržpalicyi.
Pujats padkreśliŭ, što Łatvija dla arhanizataraŭ patoku nielehałaŭ, jakija imknucca praniknuć u ES, — ciapier meta numar adzin: vidavočna, režymu Alaksandra Łukašenki (vierahodna, što paśla kansultacyj z Kramlom, udakładniaje Łatvijskaje radyjo) była pastaŭlena zadača nakiravać cisk nielehalnaj mihracyi mienavita siudy.
Na dapamohu łatvijskim kaleham užo prybyło 20 litoŭskich pamiežnikaŭ. Nakiravany i zapyt na dadatkovuju dapamohu armii.
Ale Pujats maje namier prapanavać Kabinietu ministraŭ jašče i zakryć KPP «Silene», kab jaho piersanał taksama pryciahnuć da achovy miažy. Tady lehalna pierasiekčy miažu ź Biełaruśsiu budzie možna tolki praz KPP «Paternijeki» («Hryharoŭščyna»).
Zhodna z raspracavanymi instrukcyjami, kali situacyja nie palepšycca, nastupnym krokam stanie poŭnaje zakryćcio miažy ź Biełaruśsiu, padkreślivajuć łatvijskija miedyja.
Nahadajem, što na biełaruska-litoŭskaj miažy dziejničajuć paśla dvuch zakrytych čatyry punkty propusku, na polskaj zastaŭsia adzin punkt propusku dla lehkavych aŭtamabilaŭ.
Ciapier čytajuć
Vaskrasienski: Adkryvajecca nieba — i Aleś Bialacki adrazu vychodzić29
Kamientary
Amal usie biełausy słaviać łupašenku(łu) i pucina(pu).
Voś takija biełarusy za sajuz (za Łu Pu) zrazumieła čaho jeduć u ES.