«Vielmi bajusia, što mianie «amnistujuć», jak i Kuchara». Hirkin-Strałkoŭ raspavioŭ, što budzie rabić, kali stanie prezidentam Rasii 

«Ja čakaju, što mianie pazbaviać voli na niavyznačany termin. Heta budzie cikavy precedent, bo ŭ mianie tady nie zastaniecca miesca na Ziamli, dzie ja b nie ličyŭsia złačyncam. Na Zachadzie ja pryznany terarystam, a na radzimie, vierahodna, mianie čakaje sumnieŭnaja słava ekstremista», — napisaŭ Hirkin-Strałkoŭ padčas paštovaha intervju z rasijskim partałam Baza.

Na dumku pravajennaha błohiera, jaki raniej byŭ ministram abarony tak zvanaj «DNR» i časta krytykavaŭ Kreml za pravały ŭ vajnie suprać Ukrainy, jahony aryšt byŭ źviazany z pavieličeńniem źniešniaj i ŭnutranaj niestabilnaści, a taksama z «adčuvańniem uładami nietryvałaści svajho stanovišča».

«Situacyja radykalna pahoršyłasia, kraina ŭstupiła ŭ pieryjad vostraj niestabilnaści, što prademanstravaŭ pryhožynski miaciež i sposab źniščeńnia jaho inicyjataraŭ. Natužlivyja sproby ŭładaŭ demanstravać poŭnuju stabilnaść lišni raz padkreślivajuć skazanaje vyšej», — padkreśliŭ Strałkoŭ.

Jon dadaŭ, što nie radavaŭsia, ale i nie tužyŭ z-za śmierci Jaŭhiena Pryhožyna, bo nie viedaŭ jaho asabista i ličyŭ, što karać za miaciež jaho treba było tolki praz sud. 

Pry hetym Strałkoŭ znoŭ adznačyŭ, što nie vieryć u datyčnaść rasijskaha kiraŭnictva da zabojstva Pryhožyna, roŭna jak i ŭ aficyjnuju viersiju, što lidar «Vahniera» zahinuŭ vypadkova.

«Bolš za ŭsio ja bajusia, što zamiest zvyčajnaha kryminalnaha pakarańnia mianie «amnistujuć» hetak ža, jak i Kuchara», — pryznaŭsia ŭ svaich listach Strałkoŭ.

U jakaści adnoj z met svajho vyłučeńnia na pasadu prezidenta Rasii Ihar Strałkoŭ nazvaŭ nieabchodnaść «danieści choć krychu praŭdy» da ludziej pra realnaje stanovišča spraŭ u dziaržavie, pra budučyja pierśpiektyvy i pra toje, «jak paźbiehnuć katastrofy, jakaja nabližajecca».

Jon vykazaŭ upeŭnienaść, što «nijakaha dahavarniaka» z Zachadam nie budzie, a vajna budzie iści jašče doŭha da pieramožnaha kanca nad adnym z bakoŭ.

«Adbićcio ŭkrainskaha kontrnastupu nie admianiaje taho fakta, što vajna idzie ŭžo 21 miesiac i nijakija mety Rasii tak i nie byli dasiahnutyja. Hetaja vajna nadoŭha, i vorah imkniecca pastupova źniščyć Rasiju. Budź ja prezidentam, ja b pryniaŭ usie miery, kab pieramahčy ŭ vajnie, bo dahavarniaka nie budzie, a paraza pryviadzie da katastrofy i smuty», — zajaviŭ Strałkoŭ.

Aproč hetaha błohier napisaŭ, što jamu prychodzić mała listoŭ z voli, ale siarod ich jość «hroznyja paviedamleńni ad libierałaŭ, jakija ŭsialak jaho praklinajuć». Pišuć Strałkovu, ź jaho słoŭ, i byłyja prychilniki Alaksieja Navalnaha.

U cełym ža, pavodle słoŭ Hirkina-Strałkova, bytavyja ŭmovy ŭ jaho kamiery narmalnyja, i nijakaha cisku z boku śledčych niama. Taksama błohier napisaŭ, što ŭ jaho ŭ turmie nie było nijakich incydentaŭ, jakija b pastavili jahonaje zdaroŭje pad pahrozu. 

Nahadajem, što zajavu pra namier vyłučacca ŭ prezidenty Hirkin-Strałkoŭ rabiŭ jašče ŭ kancy žniŭnia, užo znachodziačysia ŭ turmie. Tady jon vyłučyŭ niekalki «plusaŭ», z-za jakich prezidentam RF pavinien być jon, a nie Uładzimir Pucin.

Naprykład, Pucin «nadzvyčaj davierlivy», «zanadta dobry», u jaho «šmat siabroŭ-miljarderaŭ», jon «vysokamaralnaja asoba», a sam Strałkoŭ «nie nastolki spartovy», jakim byŭ Pucin, tamu nie budzie znachodzicca va ŭładzie 20 hadoŭ.

21 lipienia Ihar Hirkin-Strałkoŭ byŭ zatrymany ŭ Maskvie. Jaho padazrajuć u publičnych zaklikach da ekstremizmu praź jaho ŭłasny telehram-kanał. Kryminalnaj spravie prysvoili hryf «całkam sakretna».

Pry hetym raniej paviedamlałasia, što suprać Strałkova raspačataja sprava pavodle č. 2 art. 280 KK (publičnyja zakliki da ekstremizmu z vykarystańniem internetu). Pa hetym artykule jamu pahražaje pakarańnie da piaci hadoŭ pazbaŭleńnia voli.

Vybary prezidenta Rasii pavinny prajści 17 sakavika 2024 hoda.

• 8
• 0
• 25
• 4
• 3
• 1
• 7
• 0