Pra heta vyśvietliłasia padčas rabočaj sustrečy dyrektarki Liceja Taćciany Mamčyc z kiraŭnictvam BDU.
Padčas sustrečy byli abmierkavanyja šlachi pavyšeńnia efiektyŭnaści prafaryjentacyjnaj raboty, pytańni ideałahičnaj i vychavaŭčaj raboty z moładździu.
Taćciana Mamčyc pieradała rektaru BDU Andreju Karalu «kalektyŭny zvarot supracoŭnikaŭ Liceja z prapanovaj ab prysvajeńni navučalnaj ustanovie imia «vydatnaha ŭradženca biełaruskaj ziamli Fieliksa Edmundaviča Dziaržynskaha», paviedamlaje telehram-kanał Liceja BDU.
Varta zaznačyć, što ideja ź Dziaržynskim nie vyhladaje niečakanaj. Uvosień 2022 hoda Licej BDU razam z KDB pravodziŭ kulturna-patryjatyčny konkurs «Pieršyja siarod roŭnych». Udzielničać u im mahli vykładčyki i liceisty. Svaje talenty im prapanavali prajavić u šaści naminacyjach. U adnoj ź ich, naprykład, kankursantaŭ prasili namalavać komiks ab žyćciovym šlachu i dziaržaŭnaj dziejnaści Fieliksa Dziaržynskaha.
Taćcianu Mamčyc pryznačyli dyrektaram Liceja BDU ŭ kastryčniku 2023 hoda, dahetul jana pracavała načalnicaj vučebna-mietadyčnaj častki Instytuta nacyjanalnaj biaśpieki.
Mamčyc — vypusknica BDU, u 1995 hodzie skončyła fiłałahičny fakultet.
Papiaredniaja dyrektarka Hanna Čubarava ŭznačaliła Licej BDU ŭ žniŭni 2021 hoda. Z adukacyi jana bijachimik, skončyła bijałahičny fakultet BDU. Pakinuła pasadu dyrektarki ŭ vieraśni 2023-ha, pryčyny nie ahučvalisia.
Da jaje dyrektaram byŭ Ihar Varaksa, jon kiravaŭ Licejem mienš za dva hady. «Licej nie zmoh by nadalej isnavać na vyśpie, adrezany ad usioj astatniaj sistemy adukacyi. U svaju čarhu, mnie nie chaciełasia b bačyć na ŭłasnyja vočy zaniapad toj spravy, u jakuju ja ŭkładaŭ dušu. A jašče nie chaciełasia niščyć svaimi ž rukami toje, što stvaraŭ padčas papiaredniaj pracy ŭ Licei. Tamu treba było adychodzić», — tłumačyŭ Varaksa svajo zvalnieńnie «Našaj Nivie».
Ciapier čytajuć
«Heta šlach adzinočki». Biełarus bolšuju častku žyćcia pravodzić u vandroŭkach — naviedaŭ užo amal 500 abjektaŭ JUNIESKA4
Kamientary