Pajezdka na karšerynhu dla dziaŭčyny skončyłasia štrafam 14 000 rubloŭ
Dziaŭčyna trapiła ŭ avaryju jašče zimoj, ale vypłačvaje doŭh pierad servisam Anytime da hetaha času. Napeŭna, heta novy antyrekord, piša Onliner.by.
Aleksandryna apublikavała fatahrafii ź miesca DTZ, a taksama ahučyła ŭ kamientarach svaju viersiju: «Zaniesła na śniezie ŭ studzieni, darohi nie pačyščanyja. Apynułasia na sustrečcy, pa zakonie vina maja. Škodu kampiensuju ja, naličyli 14 000 rubloŭ. Dali rasterminoŭku na 11 miesiacaŭ paśla 40-chvilinnych pierakonvańniaŭ».
U roznych karšerynhavych kampanij umovy arendy i praduhledžanaja damovaj adkaznaść mohuć adroźnivacca. Tamu ŭvažliva čytajcie karystackija pahadnieńnia.
Aleksandryna kaža: bolš servisami arendy aŭto nie karystajecca, vydaliła ŭsie takija dadatki: «Lepš na svajo aŭto nakaplu».
— Paśla avaryi ja adrazu patelefanavała ŭ servis, arendu skazali nie spyniać, a pieravieści aŭto ŭ režym «stajanki». Śpiecyjalist karšerynhu pryjechaŭ na miesca DTZ tolki praz hadzinu paśla pryjezdu supracoŭnikaŭ DAI. Biez razmoŭ uručyŭ list z zaprašeńniem na «acenku škody». Ja pryjechała tudy za piać chvilin da pryznačanaha času (heta było na nastupny dzień), ale ŭbačyła, što pałova mašyny ŭžo razabrana i apisana. Paśla «acenki» sa mnoj nie źviazvalisia datul, pakul nie vystavili sumu štrafu, heta značyć blizu dvuch tydniaŭ.
A dalej usio jak i va ŭsich. Nie zapłacicie — u sud. Jak mnie patłumačyli, 14 000 rubloŭ — heta tolki škoda, biez štrafaŭ i prastoju. Spačatku na apłatu dali 6 miesiacaŭ, a ŭ mianie zarobak udvaja mienšy, čym štomiesiačny płaciož! U vyniku ŭhavaryła pavialičyć termin da 11 miesiacaŭ.
A voś jak štraf kamientujuć u servisie Anytime:
— Hetuju sumu nielha razhladać jak štrafnyja sankcyi z boku kampanii, u hetym vypadku aŭtamabilu kampanii pryčynienyja miechaničnyja paškodžańni, u adpaviednaści z normami zakanadaŭstva škoda acenienaja niezaležnym acenščykam. Pamier škody — heta suma, raźličanaja niezaležnym acenščykam, što paćviardžaje pamier škody.
Klijentu vystaŭlena suma patrabavańnia, u jakuju ŭvachodzić niepasredna pamier škody, vydatki pa acency hetaj škody, a taksama vydatki pa apłacie pasłuh evakuatara dla dastaŭki ź miesca zdareńnia da miesca acenki i nastupnaha ramontu.
Nijakich štrafnych sankcyj, niaŭstojek i inšych hrašovych patrabavańniaŭ klijentu nie vystaŭlałasia, paradak vypłaty strat, paniesienych kampanijaj, vyrašany z klijentam šlacham pieramovaŭ i zaklučeńnia pahadnieńnia ab dobraachvotnaj kampiensacyi ź indyvidualnym hrafikam płaciažoŭ. Umovy zaklučeńnia takich pahadnieńniaŭ razhladajucca ŭ indyvidualnym paradku pa kožnym zdareńni z udziełam našych klijentaŭ i z ulikam šmatlikich faktaraŭ».
Kamientary