Polski sudździa-pierabiežčyk: «Idyjoty ź Biełarusi nikoli hetaha nie zrazumiejuć. Ciapier ja raźvitvajusia»
Uviečary piatnicy ŭ błohu polskaha sudździ Tomaša Šmita źjavilisia dziŭnyja dopisy na polskaj i ruskaj movach, źviarnuŭ uvahu Reform.news.
«Jany zabjuć mianie za heta» — havaryłasia ŭ adnym ź ich. Miarkujučy pa adkazach, błoh u sietcy X viadzie sam Šmit.
Spačatku Šmit apublikavaŭ spasyłku na pieśniu niamieckaha mietał-hurta Erdling «Mein Element» i padpisaŭ: «Lublu ich».
Hetaha jamu zdałosia niedastatkova, i tady były sudździa dadaŭ: «Hetyja idyjoty ź Biełarusi nikoli hetaha nie zrazumiejuć. Ciapier ja raźvitvajusia z Taŭmi (mahčyma, «vami»)».
Zatym dopisy Šmita pryniali małazrazumieły vyhlad.
Jon napisaŭ: «Jany zabjuć mianie za heta». Adzin z čytačoŭ udakładniŭ u jaho, ci pjany jon. «Nie ŭ hetaj temie», — adkazaŭ były sudździa.
Jašče adzin čytač spytaŭ u tym ža paście, navošta toj piša hłupstva.
«Heta prosta praŭda. Mnie naplavać na damoŭlenaści», — paryravaŭ Šmit.
Čytač pasprabavaŭ supakoić jaho: «Mnie taksama, ale my nie možam bieź ich žyć. Razumieju momanty sumnievaŭ, ale zaŭtra budzie lepš». Na što Šmit hruba adkazaŭ frazaj, jakuju možna pieravieści tak: «Vykinuli ruskaha». Na ŭdakładnieńni Šmit bolš nie adkazvaŭ.
Adznačyŭsia jon i ŭ inšych kamientarach pad svaimi pastami (aŭtamatyčny pierakład z polskaj):
«Plavać na heta. Ja jašče mahu im razburyć hetuju dziaržavu».
«Maje za mnoj. Ciapier im prosta chana)».
«Pracuju braty» (pa-rusku).
U kamientach karystalniki sietki X burna adreahavali na dopisy źbiehłaha polskaha sudździ. Voś tolki častka adkazaŭ, jakija jon atrymaŭ:
«U Polščy nikoha nie pieraśledujuć za toje, što jon słuchaje niamieckija hurty». «Miadovy miesiac skončyŭsia?». «Da pabačeńnia, tavaryš»
«Kali łaska, pieradajcie ad mianie pryvitańnie Emilu Čečku, kali sustrenieciesia ŭ Vałhale».
***
Tomaš Šmit abjaviŭsia ŭ Biełarusi ŭ pačatku maja 2024 hoda. Jon daŭ pres-kanfierencyju, na jakoj zajaviŭ, što budzie prasić u krainie palityčnaha prytułku. U Polščy Šmit byŭ zamiašany ŭ tak zvanaj chiejtarskaj afiory. Paśla ŭciokaŭ jaho stali padazravać u špijanažy. Šmit abvieščany ŭ vyšuk, u dačynieńni da jaho raspačataja kryminalnaja sprava. U Biełarusi ad jaho imia publikujucca prapahandysckija materyjały pra situacyju ŭ Polščy.
Raniej z Polščy ŭ Biełaruś uciok jašče adzin palak — Emil Čečka. U śniežni 2021 hoda jon dezierciravaŭ z polskaha vojska i davaŭ šyrokija intervju biełaruskim dziaržaŭnym telekanałam pra nibyta hienacyd mihrantaŭ na polskaj miažy. 17 sakavika 2022 hoda jon byŭ znojdzieny paviešanym pa miescy pražyvańnia ŭ Minsku.
Kamientary