Eks-mer Uładzivastoka, jaki atrymaŭ 15 hadoŭ kałonii, pajedzie vajavać suprać Ukrainy. Jaho pierajemnik na pasadzie mera ŭžo na froncie
Ihar Puškaroŭ zavierbavaŭsia ŭ rasijskuju armiju z kałonii. Krychu raniej na front adpraviŭsia inšy eks-mer Uładzivastoka Aleh Humianiuk.
Były mer Uładzivastoka Ihar Puškaroŭ, jaki atrymaŭ 15 hadoŭ kałonii za karupcyju, padpisaŭ kantrakt z rasijskim Minabarony i pajedzie na vajnu suprać Ukrainy.
Pra toje, što Puškaroŭ vyjdzie z kałonii i pajedzie na front, paviedamili krynicy ŭ asiarodździ eks-mera i jaho advakat, piša «Kommiersant».
Puškaroŭ kiravaŭ horadam z 2008 pa 2017 hod. Jaho aryštavali, kali jon jašče znachodziŭsia na pasadzie. U 2019 hodzie Ćviarski rajonny sud Maskvy pryznaŭ Puškarova vinavatym u atrymańni, dačy chabaru i pasiarednictvie ŭ hetym, kamiercyjnym podkupie, a taksama ŭ złoŭžyvańni słužbovymi paŭnamoctvami.
U lipieni 2022 hoda Puškarova znoŭ sudzili — pa spravie ab złoŭžyvańni słužbovymi paŭnamoctvami. Z ulikam pieršaha prysudu eks-mer atrymaŭ 15 hadoŭ i 3 miesiacy kałonii strohaha režymu sa štrafam u 5 młn dalaraŭ.
Cikava, što pierajemnik Puškarova na pasadzie mera Uładzivastoka Aleh Humianiuk prajšoŭ pa anałahičnym maršrucie. Jon zajmaŭ pasadu ŭ 2018-2021 hadach, užo paśla adstaŭki jaho zatrymali. U studzieni 2023 hoda Humianiuk atrymaŭ 16,5 hoda kałonii i štraf u 1,5 młn dalaraŭ za karupcyju: pa danych śledstva, eks-mer nabraŭ chabaraŭ na 390 tys. dalaraŭ.
U źniavoleńni Humianiuk prabyŭ niadoŭha: u śniežni 2023-ha jon zavierbavaŭsia ŭ rasijskuju armiju i źjechaŭ na vajnu.
Ciapier čytajuć
Vajb-prahramavańnie źmienić rolu raspracoŭščyka, RLVR, i kali łopnie burbałka. Biełarus-inžynier u halinie ŠI, jaki pracuje ŭ ZŠA, raskazaŭ, što nas čakaje ŭ 2026
Kamientary