Aficyjant, tancor u Tajłandzie, roli ŭ «Muchtary» i «Svatach». Piać faktaŭ pra novaha ministra kultury Čarnieckaha

Vučyŭsia na aŭtaślesara i byŭ tancoram u Tajłandzie

Akcioru 43 hady. Jon naradziŭsia ŭ Minsku i ź dziacinstva zajmaŭsia sportam i tvorčaściu — płavańnie, boks, teatralny hurtok, KVZ, hitara, balnyja tancy. Siamja žyła na vulicy Cnianskaj. U Rusłana jość siastra, starejšaja za jaho na 12 hadoŭ.

«Cichoniem ja nikoli nie byŭ, na mnie zaŭsiody skura hareła, u pačatkovaj škole biŭsia ledź nie štodnia», — raskazvaŭ budučy ministr u intervju.

Adnak razmovy pra karjeru artysta spačatku nie było. Čarniecki advučyŭsia ŭ PTV na aŭtaślesara. Ale pa prafiesii nie pracavaŭ — pryzvali ŭ armiju. Paśla vyrašyŭ być aficyjantam — navat skončyŭ adpaviednyja kursy. A ŭrešcie znajšoŭ siabie jak tancor-balnik, vystupaŭ pa kantrakcie ŭ Tajłandzie. Jon pražyŭ u azijackaj krainie dva z pałovaj hady.

Pavialičyć

Paśla vyrašyŭ zarablać na druhasnych rolach u rasijskich sieryjałach. Pryjechaŭ na kastynh u Maskvu, ale paznajomiŭsia tam ź biełaruskimi artystami. Jany paklikali Rusłana na svoj śpiektakl u Minsk. Zaviazałasia znajomstva, jakoje i viarnuła Čarnieckaha na radzimu.

Tady ž jon pastupiŭ u Biełaruskuju dziaržaŭnuju akademiju mastactvaŭ — na zavočnaje adździaleńnie. Vučyŭsia na kursie ŭ viadomaj aktrysy Zoi Biełachvościk. Byłaja pryma Kupałaŭskaha teatra pakinuła teatr na znak pratestu ŭ 2020-m, Čarniecki ž zastaŭsia vierny sistemie.

Źniaŭsia ŭ kučy rasijskich sieryjałaŭ

Z 2005 hoda Čarniecki vystupaje ŭ Nacyjanalnym dramatyčnym teatry imia Maksima Horkaha. Jon adzin ź viadučych artystaŭ tam. Letaś za rolu Edmona Dantesa ŭ śpiektakli «Hraf Monte-Krysta» jon atrymaŭ Nacyjanalnuju teatralnuju premiju ŭ naminacyi «Najlepšaja mužčynskaja rola».

Pavialičyć

Źniaŭsia bolš jak u 110 biełaruskich i rasijskich filmach i sieryjałach. Jon byŭ amal paŭsiul — «Kod Kaina», «Svaty 7», «Muchtar. Novy śled», «Kamienskaja — 5». Adznačyŭsia i ŭ niadaŭniaj prapahandysckaj stužcy Biełaruśfilma «Na inšym bierazie», stvoranaj na zakaz dziaržavy, kab vykryć žachi polskaha pryhniotu ŭ Zachodniaj Biełarusi.

Čarniecki zdymaŭsia navat u stužcy «Kupała», jakaja tak i nie vyjšła ŭ prakat. Tam jon syhraŭ adnaho z ajcoŭ BNR Antona Łuckieviča.

Pavialičyć

Maje miedal Francyska Skaryny i zvańnie zasłužanaha artysta Biełarusi. I płanuje zastacca na scenie i na pasadzie ministra.

Akcior viadzie taksama prahramu «Našie utro» na ANT.

Z žonkaj paznajomiŭsia na zdymkach

U druhim šlubie novy ministr kultury syšoŭsia z mastačkaj pa hrymie Nastaśsiaj Čarnieckaj. Jany paznajomilisia na zdymkach kino. Roźnica va ŭzroście — siem hadoŭ.

Pavialičyć

Hadujuć 9-hadovuju dačku. Dziaŭčynka z troch hadoŭ zdymajecca ŭ epizadyčnych scenach u kino, naviedvaje dziciačuju studyju pry Opiernym teatry.

Časty ŭdzielnik praŭładnych kancertaŭ 

Čarnieckaha — rostam 195 sm — lohka zapomnić vonkava. Dyj z praŭładnych mierapryjemstvaŭ jon nie vyłazić. Pracuje jak kanfieranśje na ŭsialakich forumach u padtrymku Łukašenki, a ciapier aktyŭna ŭdzielničaje ŭ kancertach u ramkach tak zvanaha Marafona adzinstva.

Kaleh, jakija vykazali pratest režymu ŭ 2020-m, jon nie razumieje.

«Treba być udziačnym, što dziaržava padtrymlivaje teatr. Takoha niama za miažoj, tam akcioram ciažka. Dziakujučy savieckaj sistemie repiertuarnaha teatra ŭ artystaŭ jość mahčymaść tvorča raźvivacca i nie dumać pra hrošy, bo dziaržava padtrymaje mastactva ŭ lubym vypadku», — kazaŭ Čarniecki na «SB».

«My ž dastatkova dobra žyli. Navošta tabie zabivać hałavu inšymi rečami?» — razvažaŭ jon pra apanientaŭ u intervju Maratu Markavu.

Pavialičyć

Paśpieŭ pabyć deputatam

Akcior paśpieŭ amal hod navat pabyć deputatam Pałaty pradstaŭnikoŭ (jaho pryznačyli ŭ 2024-m), ale ciapier pierasiadzie ŭ ministerskaje kresła. Pa biełaruskim zakanadaŭstvie sumiaščać hetyja dźvie pasady nielha.

Pavialičyć

Da jaho ministram kultury byŭ Anatol Markievič. Jon doŭhi čas uznačalvaŭ Navahrudski rajvykankam i nie mieŭ nijakaha dačynieńnia da kultury. Zapomniŭsia fota ź siostrami Hruździevymi i začystkaj dziejačaŭ kultury. Danosčyca Volha Bondarava i inšyja prarasijskija aktyvisty pry hetym ličyli jaho niedastatkova radykalnym. Peŭny čas, kab abaraniacca ad ich napadak, Ministerstva kultury navat viało ananimny telehram-kanał, dzie vyharodžvała Markieviča i adkazvała Bondaravaj.

Pavialičyć

Bondaravaj budzie składana: z adnaho boku, treba naładžvać adnosiny z novym ministram. Z druhoha — treba adnačasova zmahacca z «amaralnymi» śpiektaklami 18+ kštałtu «Nočy dla žančyn», u jakich hraŭ sam ministr.

• 2
• 4
• 9
• 25
• 3
• 3
• 4
• 0