U Rasii vypadkova vydali kolkaść vajskoŭcaŭ, jakija źnikli bieź viestak?
48 tysiač testaŭ DNK dla apaznańnia pareštkaŭ rasijskich vajskoŭcaŭ zdali ich svajaki. Hetyja źviestki namieśnica ministra abarony Rasii ahučyła na kruhłym stale ŭ Dziarždumie. Kiraŭnik kamiteta Dziarždumy pa abaronie paprasiŭ nidzie bolš «hetyja ličby nie ahučvać» i prybrać takuju infarmacyju z dakumientaŭ, piša Astra.
Kruhły stoł Kamiteta pa pracy, sacyjalnaj palitycy i spravach vieteranaŭ na temu «Zakanadaŭčaje zabieśpiačeńnie mier sacyjalnaj padtrymki ŭdzielnikaŭ SVA i členaŭ ich siemjaŭ (prablemy i šlachi ich vyrašeńnia)» prajšoŭ u 10:00 ranicy pavodle maskoŭskaha času (anałahičny minskamu) 26 listapada.
Aficyjna pra praviadzieńnie kruhłaha stała paviedamlała rasijskaje Ministerstva abarony. Jaho tranślacyja viałasia na aficyjnym sajcie Dziarždumy, ale zapisu tranślacyi na sajcie nie zachavałasia. Adnak ža jaje paśpieŭ zapisać adzin z čytačoŭ Astra.
Na mierapryjemstvie ŭ tym liku vystupała namieśnica ministra abarony RF i pa sumiaščalnictvie nibyta stryječnaja plamieńnica Pucina Hanna Cyvilova. Jana zajaviła, što ciapier usie mužčyny, jakija zaklučajuć kantrakt ź Minabarony, zdajuć testy DNK. Hetyja źviestki zatym unosiacca ŭ bazu MUS.
«Svajakoŭ DNK my taksama ŭsio biarom, jany zdajuć biaspłatna, […] taksama ŭnosicca ŭ bazu. Usich svajakoŭ, jakija da nas źviarnulisia — 48 tysiač», — paviedamiła Cyvilova.
U adkaz na heta kiraŭnik kamiteta Dziarždumy pa abaronie Andrej Kartapołaŭ zrabiŭ joj zaŭvahu:
«Kalehi, pierakanaŭča vas prašu, hetyja ličby pra bieź viestak źnikłych nidzie chaj nie fihurujuć. […] Heta takaja zakrytaja adčuvalnaja infarmacyja. Kali budziem dakumienty składać vynikovyja, taksama kab tam hetyja ličby nidzie nie płavali».
Cyvileva na heta adkazała: «Ja nazvała ličby nie źnikłych, a zvarotaŭ da nas. Mnohich jany [svajaki] znojduć. Tamu hetaja ličba mienavita zvarotaŭ, a nie statystyka».
Idzie ŭ zajavie Cyvilovaj havorka pra zdaču DNK 48 tysiačami svajakoŭ vajskoŭcaŭ, jakija źnikli bieź viestak, ci pra adzinuju bazu DNK svajakoŭ vajskoŭcaŭ, jakija znachodziacca ŭ zonie bajavych dziejańniaŭ — nieviadoma.
Adnak raniej svajaki rasijskich vajskoŭcaŭ skardzilisia, što biaspłatna zdać DNK možna było tolki pry najaŭnaści ŭ bajca aficyjnaha statusu «bieź viestak źnikły». Takaja ž infarmacyja dajecca ŭ čatach svajakoŭ vajskoŭcaŭ.
Pry hetym, praŭda, na sajcie irkuckaha ŭpaŭnavažanaha pa pravach čałavieka skazana, što DNK možna zdać i biez takoha statusu.
«Pry najaŭnaści paviedamleńnia sa statusam bieź viestak źnikłaha vajskoŭca, atrymanaha ŭ vajskovym kamisaryjacie, praceduru adboru materyjału DNK moža arhanizavać vajskovy kamisaryjat pa miescy žycharstva kroŭnaha svajaka, pry adsutnaści nazvanaha statusu DNK možna zdać praz vajskovy śledčy adździeł SK Rasii pa Irkuckim harnizonie».
Ciapier čytajuć
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Kamientary
Va Ukrainu adpraŭcie DNK, tam jany chutka znojducca.