Vienhierskuju aŭčarku puli pa imieni Amur minaki žartam nazyvajuć to «švabraj», to «šnurkom», to «mačałkaj». A dla siamji jon staŭ nie prosta lubimym hadavancam i spraŭdžanaj maraj, ale i zorkaj rajona i čempijonam Jeŭropy ŭ sabačych spabornictvach, piša Onliner.by.
Adnojčy siamiejnaja para hladzieła Animal Planet i vypadkova ŭbačyła parodu puli. Kaciaryna chutka supastaviła ŭsie fakty: ledź vyšej kalena, nie liniaje. I zajaviła: «chaču takuju».
Pa ščaniuka pryjšłosia jechać u Maskvu, prosta na Rubloŭku.
— Amur źjaviŭsia ŭ našym žyćci ŭ ciažki dla siamji momant, — praciahvaje Kaciaryna. — My byli ŭ pryhniečanym stanie, i raptam zvanok: «ščaniuki naradzilisia, chutka možna budzie zabirać». Ja liču, heta los. My jakraz mroili ab biełaśniežnym chłopčyku, i ŭsio supała — mara spraŭdziłasia.
Nasamreč, para vybirała sabaku nie tolki z-za niezvyčajnaj źniešnaści — važnuju rolu syhraŭ i dobry charaktar parody. U puli jarki brech i harezny noraŭ: «jon akazaŭsia taki duraślivy-duraślivy!» Plus da ŭsiaho heta pastuchovaja paroda: sabaka kalcuje na špacyrach, achoŭvaje siamju.
Z časam Amur staŭ dla siamji druhim dziciem. Dziela jaho Kaciarynie i Uładzimiru pryjšłosia kupić lecišča i pa paŭhoda žyć za horadam. A jašče jany lubiać brać sabaku va ŭsie padarožžy: sabaka vydatna siabie pavodzić i z zadavalnieńniem padtrymlivaje ŭsie avantury haspadaroŭ.
Vybar ščaniuka staŭ spravaj vypadku. Siarod troch prapanavanych zavodčykami Kaciaryna abrała Amura, bo jon… liznuŭ jaje ŭ nos.
— Padumała: nu, raz ty mianie ablizvaješ, značyć, pajedzieš z nami!
Canu na takoha ščaniuka haspadary ahučvajuć nieachvotna: u siarednim puli siońnia kaštujuć $1-1,5 tys.
Naohuł, pieršyja miesiacy žyćcia z Amuram stali dla siamji sucelnym adkryćciom.
— Jon vielmi hučna brachaŭ, i heta było siurpryzam, — raspaviadaje Uładzimir. — Kali bačyŭ niešta niezvyčajnaje, naprykład šłanh, abłajvaŭ jaho da pieramožnaha. Ja padazraju, što sabaka prymaŭ jaho za źmiaju.
U śniehavikoŭ taksama nie zastavałasia šancaŭ — ich Amur raznosiŭ u siekundu. A jašče ŭ jaho zvyčka valacca va ŭsim zapar: u listocie, ranišniaj rasie, śniezie.
Siabruje Amur tolki z chatnim brytanskim katom Meŭrykam. Toj źjaviŭsia ŭ siamji praz hod paśla sabaki-«švabry». Jašče siarod hadavancaŭ siamji — bałonki Pončyk i Ziefirka, jakich para pierachapiła ŭ vałancioraŭ hady try tamu. Sabaki byli chudyja i hałodnyja, u žachlivym stanie, ale Amur pryniaŭ ich jak rodnych, adrazu ablizaŭ. Tak i paviałosia: niezvyčajny kvartet žyvie družna i pieratvaraje kožny dzień haspadaroŭ u niasumnuju pryhodu.
Darečy, u dziacinstvie Amur byŭ zusim nie padobny na darosłaha sabaku-«švabru».
— Jon vyhladaŭ jak našy bałonki ciapier, tolki ŭ pavialičanym pamiery, — uspaminaje Kaciaryna. — Poŭść u ščaniukoŭ puli prachodzić pierachodny pieryjad: spačatku źminajecca ŭ vuzły, potym nahadvaje vatu, a ŭžo paźniej farmirujecca ŭ ščylnyja dredy. Usio heta adbyvajecca prykładna na dzieviatym miesiacy žyćcia i doŭžycca da paŭtara hoda. U pierachodny pieryjad naš sabaka vyhladaŭ jak paŭpuch-paŭdred, byccam jaho naohuł nikoli nie časali.
Zaraz Amur važyć kala 18 kiłahramaŭ, ź ich 3 — heta dredy. Myć ich treba ŭručnuju i abaviazkova ŭdvaich.
Pracedura składajecca z troch etapaŭ. Spačatku — supieračyščalny šampuń, zatym šampuń dla biełych sabak, a ŭ finale kandycyjanier. Paśla hetaha Amura sušać kampresarami, jakija vyciahvajuć z poŭści vadu. Kali hetaha nie zrabić, sabaka moža sochnuć da troch dzion. Myć Amura treba minimum raz u try miesiacy.
— Spačatku my sprabavali davieryć heta sałonu, ale dziaŭčynki z hruminhu admovilisia. Zatoje zdajuć nam sałon u arendu, kab my mahli sami pamyć sabaku, — raspaviadajuć haspadary.
U cełym, za vyklučeńniem dredaŭ, dohlad Amura akazaŭsia dziŭna prostym.
— Poŭści niama, čuchać nie treba. A jaho dredy — heta adnačasova i termas, i abarona ad sonca. Jon moža hadzinami lažać na chałodnym bałkonie, i jamu nie choładna. A kali idzie doždž, kropli ściakajuć pa bakach, a cieła zastajecca suchim.
Ciapier čytajuć
Na pieradśmiarotnym videa z kałonii nasamreč byŭ nie Vitold Ašurak. Źjavilisia novyja padrabiaznaści śmierci palitviaźnia6
Kamientary