«U vas jość 12 hadzin, kab źbiehčy z žonkaj i dziciem». Masad telefanavaŭ hienierałam KVIR padčas ataki

Pavodle troch krynic, znajomych z apieracyjaj, praź niekalki hadzin paśla taho, jak 13 červienia Izrail pačaŭ pieršuju chvalu ŭdaraŭ pa Iranie, u vyniku jakich zahinuli vyšejšyja vajennyja lidary ​​i navukoŭcy-jadzierščyki, izrailskija raźviedčyki pačali tajemnuju kampaniju zapałochvańnia vyšejšych čynoŭnikaŭ ź vidavočnaj metaj raskołu i destabilizacyi teakratyčnaha režymu Tehierana.

Aŭdyjazapis, atrymany The Washington Post, pryadkryvaje zasłonu nad tajemnaj apieracyjaj izrailskich śpiecsłužbaŭ, nakiravanaj na zapałochvańnie i dezarhanizacyju iranskaha kiraŭnictva.

Ludzi, źviazanyja ź izrailskimi śpiecsłužbami, jakija vałodajuć piersidskaj movaj, telefanavali vysokapastaŭlenym iranskim čynoŭnikam i papiaredžvali, što tyja buduć zabityja, kali nie admoviacca ad padtrymki režymu ajatały Ali Chamieniei.

U aŭdyjazapisie adnaho takoha zvanka, što apublikavaŭ The Washington Post, pradstaŭnik izrailskaj vyviedki źviartajecca da starejšaha hienierała ź Isłamskaha revalucyjnaha korpusa Irana:

«Ty maješ 12 hadzin, kab uciačy razam z žonkaj i dziciom. Inačaj — ty nastupny. My bližej da ciabie, čym tvaja sonnaja arteryja». Hienierału było zahadana zapisać videa, u jakim jon admaŭlajecca ad padtrymki iranskaha ŭrada, i dasłać jaho praz Telegram. Pavodle źviestak vydańnia, hienierał dahetul žyvy i znachodzicca ŭ Iranie.

Takija papiaredžańni atrymali bolš za dvaccać iranskich čynoŭnikaŭ.

Niekatorym telefanavali asabista, inšym pakidali paviedamleńni pad dźviaryma abo źviazvalisia praz svajakoŭ. Izrailskaje kiraŭnictva nie prakamientavała hetyja paviedamleńni. Apieracyja atrymała nazvu «Narod jak leŭ» i stała častkaj šyrokamaštabnaj vajennaj i raźviedvalnaj kampanii, jakaja supravadžałasia ŭdarami pa jadziernych i vajskovych abjektach Irana.

U pieršyja hadziny ataki byli zabityja klučavyja fihury iranskaj sistemy biaśpieki i jadziernaj prahramy: hienierały Chasejn Sałami, Machamad Bahiery i navukoviec Farejdun Abasi-Davani. Pavodle izrailskaha ahienta, jon zvaniŭ z krainy, jakaja «dźvie hadziny tamu adpraviła ŭ piekła» hetych ludziej. 

Izrailski śpiecsłužby śćviardžajuć, što vynikam infarmacyjnaha nastupu stała panika ŭ «druhim ešałonie» iranskaha kiraŭnictva.

Padabrać zamienu zabitym vysokapastaŭlenym asobam stała ciažka, bo patencyjnyja kandydaty admaŭlajucca ad pryznačeńnia. Pradstaŭniki Zachadu nie zafiksavali deziercirstva abo adkrytaha pierachodu na bok praciŭnika, ale pryznajuć, što situacyja ŭnutry iranskaj elity niestabilnaja.

• 9
• 1
• 5
• 0
• 0
• 1
• 1
• 0