Viadomy ŭkrainski televiadučy Dźmitryj Hardon vystupiŭ ź niečakanaj zajavaj pra spynieńnie vajny. Adnačasova Zialenski anansavaŭ važnaje rašeńnie ZŠA ŭ padtrymku Ukrainy, a telehram-kanały śćviardžajuć pra znachodžańnie kahości z kiraŭnictva Rasii ŭ Vašynhtonie.
Dźmitryj Hardon u intervju zajaviŭ, što haračaja faza vajny va Ukrainie zavieršycca ŭžo zaŭtra, 30 śniežnia 2024 hoda.
«Siońnia ŭ nas 29 śniežnia 2024 hoda. Ja jašče raz paŭtaraju, haračaja faza vajny zavieršycca ŭ hetym hodzie. Mnie skažuć: «Ty zvarjacieŭ — da kanca hoda zastałosia ŭsiaho dva dni!». Nie, siabry, ja nie zvarjacieŭ. U mianie jość infarmacyja, i ja zaraz joju padzialusia», — skazaŭ Hardon.
«Vy zaŭvažyli, što ŭ apošnija dni praktyčna niama tryvoh. Vy bačycie, što vielmi mała dronaŭ zalataje nad Ukrainaj, i zusim niama rakiet. Vy bačycie, što pahroza raptam značna źniziłasia. Vy ž razumiejecie, što Pucin pavinien bambić Ukrainu mienavita pierad Novym hodam, kab u nas nie było elektryčnaści i ciapła. Adnak hetaha niama. Čamu? Adkazvaju: tamu što jaho prasili nie rabić hetaha z Vašynhtona.
A čamu Vašynhton heta prasiŭ? Tamu što, uvaha, zaŭtra, 30 śniežnia 2024 hoda, kali ŭsio składziecca dobra, a ŭsio pavinna skłaścisia dobra, pavinna adbycca histaryčnaja sustreča, jakaja zavieršyć haračuju fazu vajny. Čakać zastałosia niadoŭha. Zaŭtra, 30 śniežnia», — patłumačyŭ Hordan.
Pakul heta zastajecca mierkavańniem žurnalista, i nijakija aficyjnyja krynicy nie paćviardžajuć prahnazavanaj padziei.
Siońnia ž Prezident Ukrainy Uładzimir Zialenski anansavaŭ važnaje rašeńnie ZŠA ŭ padtrymku Ukrainy. Ale havorka chutčej idzie pra značny pakiet dapamohi dla ŭkrainskich vajskoŭcaŭ.
«Ja viedaju, što rychtujecca važnaje rašeńnie Amieryki ŭ padtrymku Ukrainy — my čakajem aficyjnaha abviaščeńnia ŭžo zaŭtra: značnyja pakiety padtrymki dla našych vajaroŭ.
Toje, što dziejničała na praciahu hetych hadoŭ vajny dla abarony Ukrainy, i toje, što pavinna padtrymać stabilizacyjnuju pracu na froncie zaraz», — skazaŭ Zialenski.
Jon dadaŭ, što Ukraina taksama pracuje nad tym, kab inšyja partniory praciahvali padtrymlivać krainu «na nieabchodnym uzroŭni». Raniej stała viadoma, što ZŠA ŭ bližejšyja dni abvieściać kančatkovy pakiet Inicyjatyvy dapamohi Ukrainie ŭ halinie biaśpieki (USAI), vykarystaŭšy srodki, zareziervavanyja dla zakupki novaha ŭzbrajeńnia dla Ukrainy.
Kanśpirałahičnyja teoryi pra tajemnyja pieramovy i chutkaje spynieńnie haračaj fazy vajny va Ukrainie padtrymlivajuć taksama paviedamleńni, jakija siońnia publikujuć rasijskija telehram-kanały. Pavodle ich infarmacyi, maršrut samalota z asobaha lotnaha atrada «Rasija» śviedčyć pra toje, što niechta z kiraŭnictva Rasii, mahčyma, pravioŭ dva dni ŭ Vašynhtonie na hetym tydni.
Ale nijakaha bolš pierakanaŭčaha paćviardžeńnia słovy Hardona nie majuć.
«Naša Niva» — bastyjon biełaruščyny
PADTRYMAĆ
Kamientary