Były adkazny za achovu ŭsich pasolstvaŭ na terytoryi Biełarusi atrymaŭ kryminalny termin — ale ź niuansam
44-hadovy pałkoŭnik Andrej Žemajtuk — były achoŭnik Alaksandra Łukašenki — paśla adstaŭki z orhanaŭ pracavaŭ u «Hazprom transhaz Biełaruś».
Pra kryminalny pieraśled pałkoŭnika Andreja Žemajtuka, eks-načalnika ŭpraŭleńnia Departamienta achovy MUS, stała viadoma tolki ciapier, kali hety samy pieraśled skančajecca.
Akazvajecca, Žemajtuk byŭ prysudžany da pazbaŭleńnia svabody — ale z adterminoŭkaj. 20 studzienia 2025 hoda ŭ sudzie Frunzienskaha rajona Minska projdzie pasiadžeńnie, na jakim Žemajtuka źbirajucca całkam pazbavić pakarańnia.
Čym admietny hety čałaviek?
U siaredzinie 2000-ch jon byŭ achoŭnikam Alaksandra Łukašenki. «Biełpoł» paćvierdziŭ, što jak minimum z 2003 da 2007 hoda Žemajtuk byŭ supracoŭnikam v/č 01549, jakaja i ŭjaŭlaje saboj Słužbu biaśpieki prezidenta.
Ź vieraśnia 2013 hoda da maja 2021 hoda jon uznačalvaŭ upraŭleńnie Departamienta achovy MUS pa achovie dypłamatyčnych pradstaŭnictvaŭ i konsulskich ustanovaŭ zamiežnych dziaržaŭ. Jak vynikaje z nazvy, jaho supracoŭniki pracujuć pry pasolstvach i konsulstvach.
Pa stanie na vosień 2021 Žemajtuk užo ŭładkavaŭsia ŭ «Hazprom transhaz Biełaruś». Na hetym chlebnym miescy adstaŭny siłavik byŭ paznačany jak kantaktnaja asoba pa pytańniach afarmleńnia zajavak na ŭdzieł u markietynhavych daśledavańniach.
Dahetul niezrazumieła, za što na Žemajtuka zaviali kryminalnuju spravu — za Departamient achovy MUS, za «Hazprom transhaz Biełaruś» ci za štości pobytavaje, nie źviazanaje z pracaj.
Biełaruskaje zakanadaŭstva praduhledžvaje mahčymaść adterminoŭki pakarańnia ŭ bolšaści vypadkaŭ. Kryteryj prosty, ale vielmi razmyty — «kali sud paličyć, što mety kryminalnaj adkaznaści mohuć być dasiahnuty biez adbyvańnia pakarańnia».
Adnak sudy vielmi redka vykarystoŭvajuć hety miechanizm.
Za apošni čas viadoma chiba što pra niekalki vypadkaŭ, kali ŭ Bresckaj vobłaści maładyja mamy za ŭdzieł u pratestach-2020 atrymlivali pakarańnie z adterminoŭkaj.
Kali za čas adterminoŭki ŭ čałavieka nie było spahnańniaŭ, to jon zvyčajna vyzvalajecca ad pakarańnia całkam.
Kamientary