U 2024 hodzie va ŭsich haradach Biełarusi jakaść atmaśfiernaha pavietra ŭ cełym była davoli dobraj, paviedamiła načalnica słužby ekałahičnaj infarmacyi Biełhidramieta Alena Mielnik na pres-kanfierencyi ŭ čaćvier, piša smartpress.by.
Pavodle jaje słoŭ, dola pieryjadaŭ sa zdavalniajučym, drennym abo niebiaśpiečnym uzroŭniem zabrudžańnia pavietra była niaznačnaj. Pieravažna takija pieryjady naziralisia pry mietearałahičnych źjavach, jakija spryjajuć nazapašvańniu škodnych rečyvaŭ u pavietry: štyl, słaby viecier, pavyšany tempieraturny režym, pryziemnaja inviersija i praciahłaja adsutnaść apadkaŭ.
Da prablem 2024 hoda možna adnieści nastupnaje. Pieršaja — pavieličeńnie kolkaści ćviordych čaścic u pavietry, inšymi słovami — pyłu. Heta zvyčajna adbyvajecca ŭ viasnovy i letni pieryjady i źviazana z deficytam apadkaŭ.
U minułym hodzie pieravyšeńni hranična dapuščalnych kancentracyj ćviordych čaścic u pavietry fiksavalisia ŭ Homieli, Breście i Žłobinie.
Dla źnižeńnia ŭzroŭniu pyłu ŭ haradach u takija pieryjady arhanizoŭvajuć paliŭ daroh — na vulicy vychodziać paliŭnyja mašyny, — adznačyła Mielnik.
Jašče adna prablema — pavieličeńnie kolkaści drobnadyśpiersnaha pyłu. Naprykład, u Žłobinie ŭ 2024 hodzie fiksavałasia pieravyšeńnie siaredniehadavoha narmatyvu ŭ 1,4 raza ŭ paraŭnańni z 2023 hodam.
Treciaja prablema — pavyšanaje ŭtrymańnie dyjaksidu azotu (moža vyklikać kašal i dychavicu, razdražnieńnie lohkich, źnižeńnie funkcyi lohkich) u Mahilovie i Žłobinie.
Uletku ŭ krainie naziraŭsia vysoki ŭzrovień zabrudžańnia farmaldehidam (jaki moža vyklikać syp na skury, dychavicu, kašal, udušša, chrypy, branchit, aciok lohkich abo pnieŭmaniju). U asnoŭnym jon utrymlivajecca ŭ vykidach aŭtatranspartu i pramysłovych pradpryjemstvaŭ, ale nie tolki.
Najbolšaje ahulnaje siaredniaje ŭtrymańnie farmaldehidu za hod adznačałasia ŭ Pinsku, Babrujsku, Hrodnie i Breście.
Da prablem jakaści pavietra možna adnieści i pavieličeńnie ŭtrymańnia ŭ im pryziemnaha azonu ŭ viasnovy i letni pieryjady, praciahnuła pradstaŭnica Biełhidramieta. Viasnoj hetaja kancentracyja ŭ asnoŭnym maje pryrodny charaktar (sa strataśfiery). A letam jon, jak i farmaldehid, utvarajecca jak druhasnaje rečyva ŭ vyniku ŭzajemadziejańnia ź inšymi rečyvami.
— Pieravyšeńni kancentracyi ŭ pavietry inšych rečyvaŭ, u tym liku ciažkich mietałaŭ, u asnoŭnym nasili epizadyčny charaktar. U minułym hodzie ŭ siami haradach Biełarusi ŭvohule nie fiksavałasia pieravyšeńniaŭ narmatyvaŭ jakaści pavietra.
Heta Salihorsk, Baranavičy, Babrujsk, Barysaŭ, Lida, Rečyca i Śvietłahorsk, — dadała Mielnik.
Ciapier čytajuć
U Maskvie mužčyny masava sprabujuć znajomicca, macajučy dziaŭčat za jahadzicy. Tak zahadaŭ rabić seks-koŭč ź Biełarusi17
Kamientary