Hadaviny pa pravaabaroncy Jani Palakovaj

36-hadovaja žančyna zrabiła sabie śmierć paśla kplivaha artykuła ŭ «Sovietskoj Biełoruśsii».

Jak paviedamiŭ BiełaPAN pravaabaronca Aleh Vołčak, 6 sakavika pravaabaroncy naviedali mahiłu Palakovaj. «My ŭspomnili jaje, uskłali kvietki. Akramia taho, siońnia ŭ pamiaškańni minskaha ofisa Partyi BNF projdzie prezientacyja dakumientalnaha filma ab žyćci Jany. Hety film stvorany biełaruskimi žurnalistami», — skazaŭ Vołčak.

Pravaabaroncy nieadnarazova damahalisia reabilitacyi Jani Palakovaj. «U hetych sprobach my dajšli da staršyni Minskaha abłasnoha suda. Adnak nam prychodzili farmalnyja adpiski, chacia advakaty, ź jakimi my pracavali, sabrali, na moj pohlad, pierakanaŭčuju dokaznuju bazu taho, što Palakova była daviedziena da samahubstva. Isk ab abaronie honaru i hodnaści ŭ dačynieńni da haziety „Sovietskaja Biełoruśsija“ taksama byŭ adchileny. Maci Palakovaj za hod tak i nie była pieradadziena pastanova prakuratury Salihorska ab admovie ŭ raspačynańni kryminalnaj spravy, a biez hetaj papiery što-niebudź abskardzić u vyšejšaj prakuratury niemahčyma», — paviedamiŭ Vołčak.

Juryst Jania Palakova była aktyvistkaj niezarehistravanaj arhanizacyi «Pravavaja dapamoha nasielnictvu». Supracoŭničała ź inšymi pravaabarončymi arhanizacyjami, uvachodziła ŭ inicyjatyŭnuju hrupu Volhi Kazulinaj (dački viadomaha apazicyjnaha palityka) na parłamienckich vybarach 2008 hoda.

3 sakavika minułaha hoda sud Salihorskaha rajona pryznaŭ Palakovu vinavataj na padstavie artykuła 400. častka 2 Kryminalnaha kodeksa (zaviedama niepraŭdzivy danos). Jaje abvinavacili ŭ niepraŭdzivym danosie na supracoŭnika milicyi i pryhavaryli da dvuch z pałovaj hadoŭ abmiežavańnia voli. Akramia taho, pavodle rašeńnia suda jana pavinna była vypłacić supracoŭniku milicyi 1 młn. rubloŭ u jakaści kampiensacyi maralnaha ŭronu.

Jana ličyła siabie nievinavataj, śćviardžajučy, što milicyjanier nanios joj paboi.

6 sakavika 2009 hoda, napiaredadni trahiedyi, «Sovietskaja Biełoruśsija» apublikavała fieljeton pra biełaruskich pravaabaroncaŭ, u jakim akramia inšych fihuravała Palakova. Pavodle mierkavańnia siabroŭ Jany, hetaja publikacyja stała «apošniaj kroplaj», jakaja pierapoŭniła čašu jaje ciarpieńnia.

18 sakavika prakuratura Salihorska admoviła ŭ raspačynańni kryminalnaj spravy pa fakcie samahubstva Palakovaj. Čynoŭniki nie znajšli dokazaŭ taho, što pravaabaronca była daviedziena da suicydu.

• 0
• 0
• 0
• 0
• 0
• 0
• 0
• 0