Pryncesa Uelskaja Ketryn paviedamiła, što ŭ jaje pačałasia remisija

«Jak viadoma ŭsim, chto sutykaŭsia z dyjahnazam «rak», [vyzdaraŭleńnie] patrabuje času, kab pryvyknuć da novaha narmalnaha žyćcia. Tym nie mienš, ja ź nieciarpieńniem čakaju budučaha nasyčanaha hoda», — napisała pryncesa ŭ svaim dopisie, jaki padpisała jak «K».

Pra prablemy sa zdaroŭjem pryncesy Uelskaj stała viadoma hod tamu, kali jana pieraniesła apieracyju na brušnoj połaści. U sakaviku 2024 hoda Ketryn publična raskazała pra svoj dyjahnaz. Praz paŭhoda, u vieraśni, jana paviedamiła, što zaviaršyła kurs chimijaterapii, dadaŭšy, što «ciapier budzie rabić usio mahčymaje, kab bolš nie chvareć na rak».

Jak tłumačyć brytanskaja dabračynnaja arhanizacyja Cancer Research UK, jakaja finansuje ankałahičnyja daśledavańni, termin «remisija» aznačaje adsutnaść naziranych prykmiet rakavaj puchliny paśla lačeńnia. Časam złajakasnyja puchliny znoŭ źjaŭlajucca paźniej, tamu daktary zvyčajna kažuć pra remisiju, a nie pra poŭnaje vyzdaraŭleńnie.

Učora ranicaj, 14 studzienia, Ketryn naviedała Karaleŭski špital Marsdena na zachadzie Łondana. Padčas vizitu jana padziakavała piersanału, padzialiłasia ŭłasnym dośviedam i vykazała padtrymku inšym pacyjentam. Jak zapeŭniła ich pryncesa, niahledziačy na toje, što lačeńnie «ciažkaje», «u kancy tunelu jość śviatło».

Pa słovach Ketryn, jana da hetaha času adčuvaje nastupstvy zachvorvańnia. Heta tyčycca nie tolki pabočnych efiektaŭ, vyklikanych lačeńniem, ale i inšych, bolš doŭhaterminovych nastupstvaŭ.

«Vy dumajecie, što lačeńnie skončyłasia, i vy možacie viarnucca da narmalnaha žyćcia, ale heta ŭsio jašče sapraŭdnaje vyprabavańnie», — skazała jana.

Padčas vizitu ŭpieršyniu stała viadoma, što Ketryn prachodziła lačeńnie ŭ Karaleŭskim špitali Marsdena. Pryncesa padziakavała kamandzie daktaroŭ, jakija akazvali joj dapamohu, i ŭsim tym, chto «cicha išoŭ pobač» ź joj i pryncam Uiljamam, pakul jany pieraadolvali ŭsie ciažkaści.

Heta pieršy vychad pryncesy Ketryn u 2025 hodzie i jaje najbolš značnaje samastojnaje karaleŭskaje mierapryjemstva paśla zaviaršeńnia lačeńnia. Ketryn pastupova pačała źjaŭlacca na publicy ŭ minułym hodzie, kali naviedała słužbu Dnia pamiaci zahinułych i naviedała kaladny kancert u Viestminsterskim abactvie. Heta było ŭspryniata jak dobry znak u kantekście jaje vyzdaraŭleńnia.

Karaleŭski špital Marsdena, u jakim štohod prachodziać lačeńnie 59 000 pacyjentaŭ, byŭ zasnavany jak śpiecyjalizavany ankałahičny špital u 1851 hodzie. Ketryn razam z pryncam Uiljamam stali karaleŭskimi apiekunami špitala. Raniej karaleŭskim apiekunom hetaha špitala była pryncesa Dyjana.

• 3
• 0
• 0
• 1
• 1
• 0
• 0
• 2