«Nie kantačcie z ekstremistami». Jak ludzi prachodziać praź pieradvybarčyja pravierki siłavikoŭ
Pierad prezidenckimi vybarami, pryznačanymi ŭ Biełarusi na 26 studzienia, milicyjaniery i čynoŭniki pravodziać pravierki i «prafiłaktyčnyja hutarki» z asudžanym na chatniuju chimiju, eks-palitviaźniami i tymi, kaho zatrymlivali paśla pratestaŭ u 2020 hodzie. «Miedyjazona» daviedałasia niekatoryja padrabiaznaści. Imiony hierojaŭ źmienienyja.
Z prakuroram mieć znosiny bolš pryjemna, čym sa «ŭsialakim hubazikam»
Asudžanaha na chatniuju chimiju Alaksandra vyklikali na razmovu ŭ prakuraturu. Pavodle jaho słoŭ, razmova prachodziła spakojna, a mieć znosiny z prakurorskim rabotnikam było pryjemniej, čym z «opierami i hubazikam».
«Pytaŭsia, čamu ja vychodziŭ u 2020 hodzie, čym byŭ niezadavoleny, pytaŭsia, ci viedaju ja historyju bčb-ściaha. Kazaŭ pra dzievianostyja i pra toje, što ŭ nas ciapier takaja sacyjalnaja dziaržava, što ludzi ŭ Jeŭropie zajzdrościać i chočuć da nas pierajechać».
Pierad vybarami ŭ Alaksandra ŭzmacnilisia taksama milicejskija pravierki. U apošnija tydni siłaviki prychodzili da jaho dadomu pa dva-try razy na dzień.
Eks-palitviazień Michaił, jaki vyjšaŭ na volu ŭ 2024 hodzie, raskazaŭ, što siłaviki stali aktyŭnyja pierad Novym hodam — telefanavali z RAUS, asobna turbavaŭ učastkovy, praź milicyju paprasili zajści ŭ prakuraturu na hutarku.
«Čystaja farmalnaść. Niejki zam daŭ padpisać papierku, što ja abaviazujusia nie ŭdzielničać u niesankcyjanavanych mierapryjemstvach, pytalisia dzie pracuju, jaki artykuł, nu i ŭsio, u maim vypadku bolš nijakich maralaŭ nie było».
Paźniej dakumient prykładna takoha ž źmiestu Michaiła paprasili padpisać i ŭ rajonnym adździaleńni milicyi.
«U nas spakajniej, a chłopcy z Homiela, ź jakimi ja adbyvaŭ termin i chto ŭžo vyzvaliŭsia, raskazvali, što da ich i dadomu prychodzili, ahladali kvatery, navat fatahrafavali niešta. Ahladali, jak jany skazali, na pradmiet zabaronienaj simvoliki».
Michaił raskazaŭ, što ŭ jaho znajomyja imknucca vyjechać z horada pierad vybarami.
«Chto dalnabojščyki, u rejs prosiacca ciapier. My z žonkaj taksama płanujem kudyści vyjechać».
Vyklučyć kamunikacyju z ekstremistami
Da eks-palitviaźnia Źmitra, jaki vyzvaliŭsia paśla chimii, taksama prychodzili milicyjaniery biez papiaredžańnia. Pravieryli telefon i sacsietki, dali padpisać papieru z abaviazacielstvam «nie ŭdzielničać».
«Siaržant paraiŭ, pakul papieru kreśliŭ, vyklučyć kamunikacyju z resursami i ludźmi z «ekstremisckaha» śpisu. Mabyć, pierakazvaŭ nastaŭleńni načalnika».
Akramia hetaha, Dźmitryj «anijakaj» dźvižuchi «vakoł siabie» nie zaŭvažyŭ, i spadziajecca, što heta byŭ apošni vizit milicyi pierad vybarami.
«Raśpisacca za ekstremizm»
Maksima ź Minska štrafavali pavodle artykuła ab niesankcyjanavanych masavych mierapryjemstvach u 2020 hodzie. Pierad Novym hodam da jaho dadomu niekalki razoŭ prychodzili ź milicyi. Adzin raz, jak jon sam kaža, «raśpisacca za ekstremizm», heta značyć pastavić podpis u papiaredžańni ab tym, što za reposty «ekstremisckich materyjałaŭ» pahražaje administracyjnaja adkaznaść.
«I druhi raz niadaŭna, taksama raśpisacca, kab nie aktyŭničaŭ pierad vybarami. Jak byccam jany kamuści cikavyja».
Maksim raskazvaje, što na pradpryjemstva, dzie jon pracuje, pryjazdžali «roznyja ministry».
«Ahitacyi nul, jak byccam prosta pakazać svaju prysutnaść. I pa ŭsim horadzie tak — kožnyja 100 mietraŭ niešta pra vybary, a chto kandydaty, zdajecca, nie viedajuć navat kandydaty».
Vizity da baćkoŭ palitemihrantaŭ
Darja vyjechała ŭ 2020 hodzie paśla štrafu. Da jaje baćkoŭ prychodzili milicyjanty pierad vybarami: šukali, kab pravieści «prafiłaktyčnuju hutarku».
Daviedaŭšysia pra adjezd, milicyjanty vyśviatlali, dzie mienavita za miažoj žyvie Darja, kim pracuje i jak ź joj možna źviazacca. Taksama jany pierakonvali baćkoŭ, što Darji «zusim biaśpiečna» viarnucca ŭ Biełaruś.
Kamientary