Pad Minskam učastak ź niedabudam pradali za 302 000 rubloŭ. Na aŭkcyjonie razharnułasia sapraŭdnaja baraćba
U piatnicu ŭ Minskim rajonie prajšoŭ aŭkcyjon pa prodažy ziamielnych učastkaŭ z «niedabudam». Daloka nie zaŭsiody takija abjekty vyklikajuć vialiki popyt: mnohija addajuć pieravahu budavać z nula, a nie raźbiracca z pakinutym kimści fundamientam ci častkaj ścien. Adnak hetym razam tarhi byli haračymi, bo na prodaž vystavili ŭčastki ŭ takich pryvabnych miescach, jak Ratamka i Zasłaŭje, piša Onliner.by.
Za adzin łot zmahalisia adrazu 10 čałaviek, i jaho košt padskočyŭ da 300 000 rubloŭ!
Usiaho na tarhi vystavili 8 učastkaŭ ź niedabudavanymi abjektami. Tak, u Ratamcy, na vulicy Chvajovaj, vystavili krychu bolš za 9 sotak z reštkami padmurka, zarosłaha drevami. Ziamla znachodzicca na ŭzvyššy: u drennaje nadvorje nie kožny aŭtamabil na jaje zajedzie.
Pradavałasia nieruchomaść za 104 302 rubli. Na jaje pakłali voka adrazu čatyry čałavieki. Pieramožca zabraŭ łot za 203 256 rubloŭ ($59 606 pa kursie).
Jašče adzin učastak u Ratamcy, ale ŭžo na vulicy Pieramohi, pradavaŭsia ź niedabudavanym katedžam płoščaj 94 kvadraty. Tut papiarednimi ŭładalnikami byŭ zality padmurak, uładkavany cokal i sklep, a źniešnija ścieny ŭžo pačali «zachodzić» na druhi mansardny pavierch. Uvohule, jość z čym pracavać.
Sama terytoryja zajmaje amal 9 sotak. Za hety łot zmahalisia dva ŭdzielniki. Vynikovaja cana skłała 180 000 rubloŭ ($52 786 pa kursie).
A voś učastak u pasiołku Dziehciaroŭka novych haspadaroŭ nie znajšoŭ. Choć paramietry ŭ jaho niadrennyja: dastatkova roŭny łandšaft, pamier 15 sotak… tak, vid prosta na CEC, ale raptam kamuści nie chapaje industryjalnych piejzažaŭ u viaskovaj hłušy? Mahčyma, usia sprava ŭ startavym košcie — jana tut 158 239 rubloŭ.
Ale sapraŭdnaja vajna razharnułasia za ŭčastak u vioscy Źvieniačy, što ŭ napramku Rakava. Za 14 sotak ź vialikim niedabudavanym katedžam (minułyja haspadary zamachnulisia až na 434 «kvadraty») supierničali adrazu 10 čałaviek.
Pieramožcu łot dastaŭsia za 302 000 rubloŭ ($88 563 pa kursie), choć pačynalisia tarhi z sumy ŭ 74 541 rubiel.
Znajšli novych ułaśnikaŭ i 9 sotak u Zasłaŭi. Na terytoryi ŭžo całkam zavieršana haspadarčaja pabudova, dy i sam dom hatovy na 25%. Jon syšoŭ z małatka za 86 048 rubloŭ ($25 234 pavodle kursu).
Ciapier čytajuć
Što za 17-hadovy startapier, jaki vyliŭ cebar chłuśni na Libiera na radaść biełaruskim śpiecsłužbam22
Kamientary