Volnyja Kupałaŭcy pravodziać u Varšavie tydzień teatra i pakazvajuć svaje znakavyja śpiektakli
Volnyja Kupałaŭcy pravodziać u Varšavie tydzień teatra i pakazvajuć svaje znakavyja śpiektakli, piša Reform.news.
Monaśpiektakl Zoi Biełachvościk «Moj Hleb» raspaviadaje ab stanaŭleńni Nacyjanalnaha teatra imia Janki Kupały z 1920 hoda. Heta ščyry apovied pra asabisty žyćciovy šlach, pra historyju teatralnaj dynastyi, pra padziei ŭ Biełarusi, jakija žorstka adbivalisia na losie Kupałaŭskaha teatra i Kupałaŭcaŭ. Režysier: Alaksandr Harcujeŭ.
«Husi-ludzi-lebiedzi» Alaksandra Harcujeva — heta śpiektakl-antyŭtopija, stvorany pavodle adnoj z častkach viadomaha ramanu Alhierda Bachareviča «Sabaki Eŭropy». Z hetaha śpiektakla vymaloŭvajecca niaradasnaja karcina: tatalnaja dehradacyja, krach kultury, marali i technałohij, i hučyć skrazny matyŭ biełaruskaj biesprytulnaści i biazdomnaści ŭ śviecie. Być biełarusam — heta nia mieć svajho miesca ŭ śviecie. Abo inakš: być biełarusam — heta ŭsiudy adčuvać siabie čužym, inšym. Mahčyma, što i Čužanicaj, i Inšym.
«Ekstremisty» — śpiektakl Alaksandra Harcujeva pavodle pjesy Julii Cimafiejevaj, zasnavanaj na historyi muzykaŭ hurta Irdorath. Uzbrojenyja barabanami, hitarami i bubnami, jany vyjšli na vulicu i śpiavali pra pieramieny, što nijak nie adbuducca. Za heta na svajoj radzimie jany byli abvieščany ekstremistami.
Śpiektakl «Zekamieron» režysiera Vojcecha Urbańskaha źviazaŭ šerah apaviadańniaŭ sa zbornika Maksima Znaka ŭ adzinuju imprezu. Heta historyja pra toje, što adbyvajecca za kratami ŭ Biełarusi, u jakich umovach žyvuć palitviaźni, jak pačuvajecca čałaviek u turmie, jakija ludzi jaho atačajuć, jak adbyvajecca kamunikacyja pamiž usimi hetymi ludźmi, jak heta ŭpłyvaje na kožnaha ź ich i, narešcie, jak palitviaźniu ŭdajecca zastavacca čałaviekam. Muzyka i pieśni na słovy Maksima stali bazavym złučalnym elemientam.
Śpiektakli iduć na biełaruskaj movie z polskimi subcitrami.
Miesca: Scena Przodownik Teatru Dramatycznego, Olesińska 21.
Kvitki i padrabiaznaja infarmacyja tut.
Tydzień teatra projdzie ŭ tym liku dziakujučy narodnaj padtrymcy — srodkam, jakija atrymali Kupałaŭcy praz mahčymaść biełarusaŭ u Polščy nakiravać svaje 1,5% padatkaŭ peŭnaj arhanizacyi.
Čamu Cichanoŭskaja nie pajechała na pachavańnie Papy?23
Kamientary