U Niderłandach abjaviłasia karcina Pitera Brejhiela-małodšaha, jakaja źnikła ŭ Polščy paŭstahodździa tamu

Skradzienaja ŭ Polščy z Hdańskaha nacyjanalnaha muzieja ŭ 1974 hodzie «Žančyna, jakaja niasie vuholle» fłamandskaha majstra Pitera Brejhiela-małodšaha (čas stvareńnia kala 1626 hoda), była niadaŭna znojdziena ŭ muziei horada Haŭda ŭ pravincyi Limburh na paŭdniovym uschodzie Niderłandaŭ.

Na hetaj kruhłaj karcinie dyjamietram usiaho 17 santymietraŭ namalavanaja sialanka, jakaja niasie tlejučyja vuhli i kacioł, jakija simvalizujuć staradaŭniuju hałandskuju prykazku pra dvudušnaść.

Na praciahu dziesiacihodździaŭ miescaznachodžańnie karciny było achutana tajamnicaj i zdahadkami. Chadzili čutki pra mahčymaje dačynieńnie da źniknieńnia pałatna polskich sakretnych słužbaŭ.

Kali karcina źjaviłasia na vystavie ŭ minułym hodzie, rasśledavańnie daručyli Arturu Brandu, jaki prasłaviŭsia inšymi hučnymi adkryćciami.

Pavialičyć

Karcina była pieradadzienaja muzieju Haŭdy z pryvatnaj kalekcyi. Pa słovach pradstaŭnikoŭ muzieja, jana nie ličyłasia ŭ rejestrach vykradzienych tvoraŭ mastactva, tamu jaho supracoŭniki, hruntujučysia na najaŭnaj u ich infarmacyi, uklučyli jaje ŭ ekspazicyju.

Sapraŭdny šok jany adčuli, kali pa navodcy niderłandskaha časopisa pra mastactva Vind Artur Brand apaznaŭ skradzieny aryhinał. «Historyja prosta varjackaja», — raskazaŭ jon u intervju płatformie Artnet.

Rasśledujučy spravu, detektyŭ vyjaviŭ, što paśla kradziažu aryhinał byŭ zamienieny na repradukcyju. Padmienu vyjavili tolki paśla taho, jak u 1974 hodzie adzin z rabotnikaŭ muzieja vypadkova złamaŭ ramu. Intryhi dadaje toj fakt, što polski mytnik, jaki raskryŭ nielehalny ekspart tvoraŭ mastactva praz bałtyjski port Hdynia, trahična zahinuŭ niezadoŭha da taho, jak jaho zmahli dapytać.

Ciapier niderłandskaja palicyja pracuje z polskimi kalehami nad tym, kab karcina viarnułasia dadomu. «My znachodzimsia ŭ pastajannym kantakcie ź niderłandskimi ŭładami», — paćvierdzili ŭ Ministerstvie kultury Polščy.

Artur Brand, jakoha nazyvajuć «Indyjanaj Džonsam śvietu mastactva» za ryzykoŭnyja i paśpiachovyja pošuki, zrabiŭ sabie imia na stračanych i zdabytych skarbach. Ciapierašni tryumf papoŭniŭ jahonaje i biez taho ŭražlivaje partfolio, u jakoje ŭvachodzić viartańnie rańniaj karciny Vinsenta Van Hoha «Pastaralny sad u Niuenienie viasnoj» (1884), vykradzienaj padčas rabavańnia Amsterdamskaha muzieja ŭ 2020 hodzie.

• 4
• 0
• 0
• 0
• 0
• 0
• 0
• 1