У Нідэрландах аб'явілася карціна Пітэра Брэйгеля-малодшага, якая знікла ў Польшчы паўстагоддзя таму
Карціну фламандскага майстра Пітэра Брэйгеля-малодшага, выкрадзеную з Гданьскага музея ў 1974 годзе, знайшлі ў Нідэрландах намаганнямі дэтэктыва, якога празвалі «Індыянай Джонсам свету мастацтва», паведамляе Euronews.
Скрадзеная ў Польшчы з Гданьскага нацыянальнага музея ў 1974 годзе «Жанчына, якая нясе вуголле» фламандскага майстра Пітэра Брэйгеля-малодшага (час стварэння каля 1626 года), была нядаўна знойдзена ў музеі горада Гаўда ў правінцыі Лімбург на паўднёвым усходзе Нідэрландаў.
На гэтай круглай карціне дыяметрам усяго 17 сантыметраў намаляваная сялянка, якая нясе тлеючыя вуглі і кацёл, якія сімвалізуюць старадаўнюю галандскую прыказку пра двудушнасць.
На працягу дзесяцігоддзяў месцазнаходжанне карціны было ахутана таямніцай і здагадкамі. Хадзілі чуткі пра магчымае дачыненне да знікнення палатна польскіх сакрэтных службаў.
Калі карціна з'явілася на выставе ў мінулым годзе, расследаванне даручылі Артуру Бранду, які праславіўся іншымі гучнымі адкрыццямі.
Карціна была перададзеная музею Гаўды з прыватнай калекцыі. Па словах прадстаўнікоў музея, яна не лічылася ў рэестрах выкрадзеных твораў мастацтва, таму яго супрацоўнікі, грунтуючыся на наяўнай у іх інфармацыі, уключылі яе ў экспазіцыю.
Сапраўдны шок яны адчулі, калі па наводцы нідэрландскага часопіса пра мастацтва Vind Артур Бранд апазнаў скрадзены арыгінал. «Гісторыя проста вар'яцкая», — расказаў ён у інтэрв'ю платформе Artnet.
Расследуючы справу, дэтэктыў выявіў, што пасля крадзяжу арыгінал быў заменены на рэпрадукцыю. Падмену выявілі толькі пасля таго, як у 1974 годзе адзін з работнікаў музея выпадкова зламаў раму. Інтрыгі дадае той факт, што польскі мытнік, які раскрыў нелегальны экспарт твораў мастацтва праз балтыйскі порт Гдыня, трагічна загінуў незадоўга да таго, як яго змаглі дапытаць.
Цяпер нідэрландская паліцыя працуе з польскімі калегамі над тым, каб карціна вярнулася дадому. «Мы знаходзімся ў пастаянным кантакце з нідэрландскімі ўладамі», — пацвердзілі ў Міністэрстве культуры Польшчы.
Артур Бранд, якога называюць «Індыянай Джонсам свету мастацтва» за рызыкоўныя і паспяховыя пошукі, зрабіў сабе імя на страчаных і здабытых скарбах. Цяперашні трыумф папоўніў ягонае і без таго ўражлівае партфоліо, у якое ўваходзіць вяртанне ранняй карціны Вінсэнта Ван Гога «Пастаральны сад у Нюэнене вясной» (1884), выкрадзенай падчас рабавання Амстэрдамскага музея ў 2020 годзе.
Цяпер чытаюць
Галіна Дзербыш казала пракурору: «Як памру, буду да ўсіх вас ноччу прыходзіць». І жыццё ўжо дагнала яе суддзю і сведак. Гісторыя пенсіянеркі, якой далі 20 гадоў калоніі
Каментары