Futbolnyja lehijaniery z Afryki raskazali, jak im zachodziać stravy biełaruskaj kuchni
Spartyŭnaje vydańnie Bet News vyrašyła pahavaryć z afrykanskimi futbalistami, jakija hulajuć u Biełarusi, pra toje, jakija prablemy ź ježaj uźnikali ŭ ich u našaj krainie. Usio ž taki ahulnaja roznaść kultur upłyvaje ŭ tym liku i na hastranamičnaje ŭspryniaćcie.
Nie tak daŭno futbolny ahient Juryj Famin raskazaŭ zajmalnuju historyju pra adnaho sa svaich klijentaŭ, kamierunca Saahi Dzieniahu, jaki vystupaŭ za «Minsk» u 2022-2023 hadach:
«U niejki pieryjad u kłubie vielmi šmat hrečkaj karmili, a afrykancy nie razumieli, što heta za pradukt. Dajšło da taho, što ŭ niejki momant Saahi skazaŭ: kali siońnia budzie hrečka, to na treniroŭku nie vyjdu. Pryjšłosia kupić makarony».
Heta situacyja jakraz i natchniła žurnalistaŭ na toje, kab raspytać i inšych afrykanskich futbalistaŭ, što hulajuć u Biełarusi, pra ich kulinarnyja ŭpadabańni.
Ehiedeh Mahłuar («Viciebsk»; Kamierun)
«U Biełarusi ja praktyčna nie sutykaŭsia z hastranamičnymi ciažkaściami. Zaŭsiody z apietytam jem biełaruskija stravy, i jany mnie padabajucca. Ale hrečka taksama zdajecca čymści vielmi dziŭnym. Nie vielmi padabajecca jaje asablivy smak.
U hetym hodzie na Maślenicu ja pakaštavaŭ bliny. Vielmi spadabalisia. Viadoma, u Kamierunie taksama jość padobnyja stravy. Bolš za ŭsio sa straŭ, što ja jem tut, mnie padabajecca płoŭ».
Luk Nelsan («Ahra-Pielišča» z Kamianca; Nihieryja)
«Dumaju, niepavažliva kazać kiepska pra ježu inšaj krainy. Ale, žyvučy ŭ Breście, ja kuplaju šmat afrykanskich praduktaŭ. Zakazvaju ich u kramach u Polščy albo Rasii. Tak što prablem u mianie niama.
Ź biełaruskaj ježy lublu smažanuju bulbu, ale jem jaje nie tak časta, jak vašy ludzi. Lublu bliny.
Zrazumieła, što kultury ŭ nas zusim roznyja. Ja, naprykład, nie razumieju, jak možna jeści čorny chleb biez cukru. Jak? Choć umalajcie mianie, ale ja jeści nie budu — jon ža na smak niesałodki! Lublu i bieły chleb z cukram.
Taksama ja nie pju harełku i piva, nie jem tuniec, saleńni. Akramia taho, nie vielmi padabajucca sałaty, jakija tut robiać. Viadoma, ja ich jem. Ale kali jość mahčymaść, to lepš ja sam pryhatuju sałatu».
Duhłas Visdom («Słonim-2017», Nihieryja)
«Ź ježaj u Biełarusi ŭsio dobra. Prosta vašy tradycyjnyja stravy ja amal nie jem. Ničoha drennaha nie skažu, ale pryvyk da inšaj ježy — afrykanskaj i anhlijskaj.
Naprykład, nie mahu jeści biełaruskija supy. Dla mianie heta dziŭna. Ale bolšaść maich afrykanskich subratoŭ ich lubiać. Prosta ja vielmi pieraborlivy ŭ ježy čałaviek.
Tut ja ŭ asnoŭnym hatuju rys i tamatnaje rahu z kurycaj, indykom albo śvininaj. Taksama ŭžyvaju šmat sadaviny i sokaŭ. Pry hetym ja nie pju ałkahol i nie kuru».
Kryścijan Intsojen («Smarhoń»; Kamierun)
«Ščyra kažučy, pa pryjeździe ŭ Biełaruś ničoha dziŭnaha ź ježy ja nie sustreŭ. Što ŭ Biełarusi, što na radzimie pradukty ŭ kramach prykładna adnolkavyja. Biełaruskuju ježu sam nie hatuju, jaje hatuje maja žonka, i ja jem z zadavalnieńniem.
A voś z afrykanskich straŭ lublu sam hatavać arachisavuju pastu z kurycaj i rysam i manku sa špinatam. Heta vielmi smačna».
Cita Jormi Džunijor («Lida»; Libieryja)
Usiu biełaruskuju ježu jem z zadavalnieńniem. I ŭsie pradukty, što kaštavaŭ, mnie padabajucca. Viadoma, mianie jak čałavieka ź Libieryi niekatoryja stravy adrazu ździvili. Ale jany ŭsio adno padabajucca.
Baršču i dranikaŭ u Libieryi paprostu niama, i dla nas heta moža padacca dziŭnym. Jak niama i sała mienavita ŭ takim vyhladzie. Ale heta nie značyć, što my nie ŭžyvajem tłuščy žyviolnaha pachodžańnia zusim. Prosta hatujuć toje ž sała ŭ nas krychu pa-inšamu. Jaho zvyčajna vykarystoŭvajuć u rahu».
Łukuman Aliu («Homiel»; Nihieryja)
«Ja zusim nie jem stravy, dzie jość śvinina. Tamu što ja musulmanin, i mnie nie dazvalaje hetaha rabić relihija. Voś i ŭsio. Astatniaje ja jem».
Ciapier čytajuć
«Jany mianie saromiejucca». Jak praz 12 hadoŭ žyvie biełaruska, što naradziła dvajniat u 54 hady28
Kamientary